"Dünən Nicat turnirin reytinq favoritinə qarşı oynayırdı. Yekunda məğlub olsa da, oyun yaxşı keçdi. Şahmatçımız qara fiqurlarla oynayırdı. Nəzərə almaq lazımdı ki, qara fiqurlarla Karuanaya qarşı oynamaq çox çətindi. Rəqibin, demək olar ki, zəif xüsusiyyəti yoxdu. Oyunun başlanğıc hissəsi pis alınmadı. Şahmatçımız debütdə yaxşı gedişlər etdi. Bir tərəfdən nəzərə almaq lazımdı ki, seçdiyi debüt də Karuananın həyatı boyunca oynadığı bir variant idi. Ona görə də Karuana üçün rahat oldu ağ fiqurlarla oynamaq. Oyunda hər şey qaydasında idi. Sadəcə, son 2-3 gedişdə hər şey korlandı. Son anlarda Nicat məğlub oldu. Fikrimcə, bunun əsas səbəbi təcrübəsizlikdi. Nicatın məğlub olmamışdan 4-5 gediş əvvəl bir neçə yaxşı seçimi var idi ki, orda hesablamada bir qədər çətinlik çəkdi. 3-4 gediş irəlidə açar gedişlər var ki, onları görə bilmədi və yekunda həmin variantlara getmədi. Bəlkə də başqa cür oyunu davam etdirmək olardı. Lakin biz qıraqdan kompüter dəstəyi ilə bu cür gedişləri görürük. Amma şahmatçı oyunda heç bir köməkdən istifadə etmir. Yekunda səhv edəcəyi bəlkə də başadüşülən idi. Təbii ki, daha yaxşı olmasını istəyərdik. Amma yenə də fikirləşirəm ki, çox yaxşı oyun keçdi. Nicat qorxaq oyun göstərmədi. Bəzən çox riskli və inamlı gedişlər etdi. Həmin gedişlər də özünü müəyyən şəkildə doğrultmuş oldu. Son dəqiqələrdə səhvə yol verməsəydi, ən azı yarım xal götürə bilərdi. Amma dünyanın axırı deyil. Qarşıda daha 12 tur var. Bu gün ağlarla Hikaru Nakamuraya qarşı oyunu var. Dünən hər ikisi məğlub olub. Amma ümid edirəm ki, məğlubiyyət Nakamuraya daha çox psixoloji təsir edib".