“Neftçi” - “Sumqayıt” oyunu başqa ab-havada keçdi. Sirr deyil ki, bu qarşılaşma son illər prinsipial xarakter daşıyır. Baş məşqçi amili bu komandaların oyununda da özünü göstərir. Matçın gərginliyi həm də mövsümün sonuna az qalmasıyla bağlıdı. Çempion bəllidi, 2-3-cü yerlər uğrunda mübarizə isə davam edir. Düzdü, FİFA referesi oyuna nəzarəti əlində saxlamağa çalışırdı. Elçin Məsiyevdə arxayınlıq hiss olunurdu. Bir neçə epizodda VAR-a çağrıldı. Hərçənd mübahisəli epizod varsa, VAR-ı gözləməli deyilsən, özün o epizodu dəyərləndirməlisən. “Neftçi”nin penalti epizodunu hakimin mövqeyindən də görmək olardı. Oyunçunun dabanına zərbə vurulduğunu biz ekrandan görrürüksə, hakim görməyə bilməz. Oyunu saxla, ekrana bax, sonra qərar ver. Penaltinin verilməməsi məni də məyus etdi. Məncə, epizodu incələsəydilər, qərar başqa cür olardı. Hər halda, VAR-da oturanlar da diqqətli olmalıydı”.

“Belə məqamlarda hər cür söz-söhbət olur. Amma bütün hallarda diqqət hakimlərin üzərinə yönəlir. Fərqli düşüncələrin olması normaldı. Buna da hazır olmaq lazımdı. Həmçinin qış fasiləsində hazırlıq keçərkən çətin oyunların olacağı və bəzi komandaların narazılıq edəcəyi gözlənilən idi. Hər mövsüm belə olub. Lakin son 10 il ərzində çempionatda belə gərginlik izləməmişdik. Əvvəldən deyirdim ki, sona yaxınlaşarkən daha təcrübəli, peşəkar hakimlərə üstünlük verilməlidi. Çünki səhv qərar söz-söhbətlə nəticələnir. Bütün hallarda hakim diqqətli olmalı, komandaların taleyi ilə oynamamalı, qəti və dəqiq olmalıdı. Həmçinin VAR sistemi hakimləri arxayınlaşdırmamalıdı. Təəssüf ki, belə deyil. Sadə bir epizodda da, gərgin epizodda da VAR-a baxılmamalıdı. Bəzən epizoda baxıb cəld qərar vermək lazımdı. Vaxt itirmək yersizdi. Qurban Qurbanovun son oyundakı etirazı da bununla bağlı idi. Qayda pozuntusu zamanı operativ olmaq, komandaları Avropa oyunlarına hazırlamaq lazımdı. Futbolçular o tərzə, sürətə öyrəşməlidi. Belə qeyri-peşəkar qərarlar komandalara pis təsir edir. Bir tur ərzində həm “Qarabağ”ın, həm də “Sumqayıt”ın baş məşqçisinə “sarı” verilməsi yaxşı hal deyil. Vərəqədən qaçmaq lazımdı. Əsas məsələ oyunçular arasında nüfuz qazanmaqdı. Hakim nüfuzlu olanda narazılıq azalır. Vay o hala ki, hakim vərəqələrlə kiməsə hədə-qorxu gəlir. Elçin Məsiyev gənc hakimdi, futbol biliyi zəngindi. İnanmıram ki, hansısa qərəz olsun. Hakimlər Komitəsində işlədiyim vaxt görmədim ki, hansısa hakim haqda “qərəzli davranır” kimi söz-söhbət gəzsin. Kiminsə epizoda yanaşması fərqli ola bilər, amma burda heç bir kin-küdurətdən söhbət gedə bilməz. Hansı hakim işinin öhdəsindən layiqincə gələ bilsə, UEFA-nın qapıları üzünə açıq olur. Elçin Məsiyev barədə belə şeyin olduğunu düşünmürəm” .

“Oyunsonrası baş məşqçi fləş-müsahibə vaxtı isti başla fikir yürüdə, hakimi tənqid edə bilər. Amma gedib epizoda baxanda fikrini dəyişir. Hakimlərə ədalətli davranmağı məsləhət görürəm. Kim hansı yerə layiqdisə, çempionatı o pillədə yekunlaşdırsın. Hansısa hakim qərəzli münasibət göstərirsə, Hakimlər Komitəsi dərhal addım atmalı, ciddi ölçü götürməlidi. Futbol aləmi paklıq, təmizlik sevir. Ədalət təmsilçisi ədalətli davranış sərgiləməlidi. Hakimlərə tövsiyə edirəm ki, diqqətli olsunlar. VAR-da əyləşənlər isə vaxtı çox uzatmadan, operativ qərar verməlidi”.