“Turnirdə iştirak edən, formada olan güclü şahmatçılar var. Nicat reytinqə görə autsayderidi. Təbii ki, reytinq hər şey demək deyil. Bunu Nicat Bakıda keçirilən son Dünya kubokunda da sübut etdi, yarımfinala qədər irəlilədi. Həmin mərhələyə qədər bir çox güclü şahmatçıya qalib gəldi. Təəssüf ki, ardından digər beynəlxalq yarışlarda elə də yaxşı çıxış etmədi. Oyunları sanki istədiyi kimi alınmırdı. Düşünürəm ki, bu turnirə yaxşı hazırlaşıb. Köməkçilərindən biri dünya şahmatının əfsanələrindən olan Şəhriyar Məmmədyarovdu. Məncə, Şəhriyar həm debüt, həm də sonluq üçün biliklərini Nicata verib. Hər birinin fərqli oyun üslubu var. Şəhriyar birbaşa hücuma keçən, Nicat isə müdafiə olunan və rəqibin səhvini gözləyən şahmatçıdı. Bu iki fərqli üslubun bir yerdə ortaya çıxaracağı oyun çox maraqlıdı. Şahmat taxtasının arxasına keçən şəxs Nicat Abbasovdu. Buna görə də öz üslubuna uyğun davam edəcəyini görəcəyik. Nicatın turnirdə yaxşı nəticə göstərmək şansına iki yöndən yanaşıram. Birincisi, reytinq autsayderi olduğu üçün rəqib şahmatçılar onun üzərinə gəlməyə çalışacaq, hamısı hücum oynayacaq. Yaxşı müdafiə oluna bilsə və rəqibin hücumı zamanı boşluq tapa bilsə, qələbə qazana bilər. İkincici, ilk 5 tur ərzində 1 qələbə, 4 heç-heçə əldə edib, məğlub olmasa, turnirin sonuna qədər müəyyən şansları ola bilər. Bu elə turnirdi ki, bir aya yaxın çəkir. Dünya kuboku da belə idi. Orda çox yaxşı nəticə qazanmışdı. Düşünürəm ki, bacardığı qədər gec uduzsa və ya uduzmasa, şansı daha çox olacaq. Nicat sirrli qutudu. Necə mübarizə aparacağı bilinmir. İnanıram ki, bir çox şahmatçıya başağrı olacaq.

İlk turlarda yetərincə güclü şahmatçılar - Yan Nepomnyaşi və Fabiano Karuana ilə qarşılaşacaq (söhbət turnirin startı ərəfəsində olub – red.). Hər ikisi İddiaçılar turnirinin qalibi olub. Hər oyunda ən azı yarım xal gözləmək lazımdı. Bir problem isə Nicatın səhhətində olan problemdi. Bir ay əvvəl fiziki məşq zamanı dizində çarpaz bağlar qopmuşdu. Ayağında tibbi aparat var. Amma özü də müsahibəsində bildirdi ki, rahat şəkildə yeriyə bilirəm. Heç bir problem yoxdu. Bəlkə də bu ona bir tərəfdən kömək edəcək ki, çox gəzməyəcək. Bir yerdə oturacaq. Şahmatçımıza uğurlar arzulayıram şahmatçımıza. İnanıram ki, vətənə tarixi nəticə ilə qayıdacaq”.