"Mütləq yer tutmalıyıq kimi tələbimiz yoxdu"
Misli premyer-liqasının 28-ci turunda "Sumqayıt" "Araz-Naxçıvan"ı qəbul edib - 1:0.
"Football-plus.az" xəbər verir ki, matçdan sonra meydan sahiblərinin məşqçisi Mübariz Orucov mətbuat konfransında iştirak edib. Sizi onun fikirləri ilə tanış edirik:
"İlk hissə tam bizim üstünlüyümüzlə keçdi. Demək olar ki, meydanda bir komanda var idi. Epizodlarımız çox oldu, onlardan istifadə etsəydik, hesab daha böyük olardı. Belədə, ikinci hissəni daha rahat oynamaq mümkün idi. Amma vurmadıq deyə, bir az gərginlik yarandı. Futbolçularda yorğunluq hiss olunurdu, oruc tutanlar çoxdu. Oyunun vaxtı da oruc tutanlar üçün əlverişsiz idi. Demək olar ki, su içib davam etdilər. Yorğunçuluq fonunda keyfiyyət də aşağı düşdü. Oyun bizim üstünlüyümüz şəraitində keçdi, haqlı qələbə qazandıq. Vacib qələbə idi. Davam edirik. Son mərhələyə girmişik. Artıq bütün oyunlar vacibdi. Bundan sonra hər komanda ilə bir oyun qalıb. Hər görüşə qələbə üçün çıxacağıq".
- Sizdən əvvəl digər rəqibləriniz oynamışdı və hansı nəticənin sizi hansı pilləyə yüksəldə biləcəyini bilirdiniz. Bu sizdə əlavə təzyiq yaratmışdı?
- Bilirik ki, belə şeylər futbolçularda təzyiq yarada bilər. Ona görə Samir Abasov çalışır ki, uşaqlara rahatçılıq versin. Uşaqlardan mütləq yer tutmalıyıq kimi tələbimiz də yoxdu. Futbolçulara deyirik ki, meydanda gözəl futbol göstərin, oyunumuzu inkişaf etdirək. Çalışırıq ki, təzyiqi futbolçulardan uzaqlaşdıraq. Nə qədər bacarırıq, bilmirəm.
- Penalti epizodunu izləmisiz?
- Vallah izləməmişəm. Amma eşitdim ki, narazılıqlar var.
- Sosial şəbəkələrdə də müzakirə edilir və idman ictimaiyyəti də haqsız penalti olduğunu düşünür...
- Epizodu tam görməmişəm. Haqsızlığı nədə görürlər? Epizod itsə belə, top meydandadısa, təmas olubsa penalti verilməlidi. Qapıçı topu əlinə götürüb, amma rəqibini vurur. Bu nədi? Penalti. Cərimə meydançasında təmas varsa, penalti qərarı doğrudu.
- Hakim idarəçiliyindən razı qaldız?
- Baxıram ki, elə rəqib də narazı idi, biz də. Olur da, hakimlər də səhv edir. Bizim özümüz də bir neçə dəfə haqsızlıqla qarşılaşdıq. Deyim ki, hakim bərbad idi, xeyr.
- "Sumqayıt" üçün baxımlı oyun vacibdi, yoxsa üç xal?
- Əlbəttə ki, bu dəqiqə ən vacibi üç xaldı. Ancaq yaxşı oyunla üç xal daha ləzzətli olur. Düzü, elə mərhələdi ki, bu dəqiqə üç xalı istəyərdik.
- Avrokuboklara vəsiqə qazansanız, komanda bu oyunla orada nə edə bilər?
- Avrokuboklara vəsiqə qazansaq, yəqin ki, komanda güclənməlidi. O yöndə də işlər görüləcək. Düzdü, qışda transfer edə bilmədik. Transfer etməməyimizin səbəbi sırf maliyyə ilə də bağlı deyil. Maliyyəmiz yüksək deyil ki, yaxşı oyunçular götürək. Sadəcə, qışda yaxşı futbolçu tapmaq çətindi. Yaxşı oyunçuların klubla müqaviləsi olur. Belədə, həm özünə, həm də klubuna pul ödəməlisən. Azad agent statusunda olanlar da bizim xoşumuza gəlmədi. Transfer xətrinə oyunçu götürmək istəmədik. Yayda avrokuboklara düşsək də, düşməsək də güclənmək istəyirik. Komanda ildən-ilə ələnməlidir. Yaxşı oyunçularla yolumuza davam edəcəyik.
Digər xəbərlər
