“Kəpəz” və “Mingəçevir” “F-holdinq”dən müraciət gözləyir
“F-holdinq”in “Kəpəz”in və ya “Mingəçevir”in sponsoru olmaq ehtimalından yazmışdıq.
Şirkət rəsmiləri bununla bağlı hər iki klubun bazasına baş çəkmiş, daha sonra özündə müsbət siqnallar daşıyan açıqlamalar vermişdi. Ardından Gəncə təmsilçisinin İdarə Heyətinin sədri İlqar Nadiri tərəflər arasında hansısa rəsmi danışıq olmadığını bildirmişdi. Belədə iş elə gətirdi ki, “Minçevir” məsələsi arxa planda qaldı. Bununla yanaşı, prosesin başlamasından bir neçə həftə ötsə də, heç bir yenilik yoxdu. Görəsən, məsələ nə yerdə qaldı?
Bu yöndə dəqiq bilgi almaq üçün tərəfləri təmsil edən şəxslərlə əlaqə saxlamağı lazım bildik.
Tural Piriyev (Futbolun İnkişaf Fondunun icraçı direktoru):
“Hələ ki hansısa irəliləyiş yoxdu. Bildiyimə görə, “F-holdinq”in əsas fəaliyyət sahəsi “Kəpəz”ə yönəlmişdi. Lakin indiyə qədər hansısa irəliləyiş olmayıb. Bir müddət gözləmək lazımdı”.
Azad Mustafayev (“Kəpəz”in mətbuat xidmətinin rəhbəri):
“F-holdinq”dən bizə hər hansı rəsmi müraciət daxil olmayıb. Sponsor tapmaq istiqamətində axtarışlarımız davam edir. Çox istəyərik ki, tezliklə bu kimi məsələlər həllini tapsın”.
Elnur Qasımov (“Mingəçevir”in mətbuat xidmətinin rəhbəri):
“Yenilik yoxdu. “F-holqind” bizə müraciət edəcəyi halda FİF-in iştirakıyla danışıqlara başlayacağıq. Son qərarı da birgə verəcəyik. Şirkət rəsmiləri, sadəcə, baxış keçirib gediblər. Ondan sonra bizə əlavə məlumat verilməyib”.
Görünür, “bu xəmir hələ çox su aparacaq”. Bilinən isə odu ki, “F-holdinq” seçimini “Kəpəz”dən yana etmək niyyətindədi. Və bu yöndə gemişmiqyaslı planlar var. Danışıq prosesinə gəlincə, burda durğunluq dönəmidi. Bəlkə də şirkət Gəncə təmsilçisinin premyer-liqaya yuvarlanmayacağına əmin olmaq istəyir və məhz həmin andan sonra “Kəpəz”ə rəsmən müraciət ediləcək? Hər şeyi zaman gösətərəcək. Hər halda, “F-holdinq”in “Mingəçevir”i deyil, məhz “Kəpəz”i ön planda tutması bunu iddia etməyə imkan verir…
KƏNAN BAHADIR
Digər xəbərlər
