"Bolqarıstanla matçda oyunumuzu ikinci zonada quracağıq"
“FIFA series – Edition 2024” layihəsi çərçivəsində sabah keçiriləcək Azərbaycan – Bolqarıstan oyunundan öncə mətbuat konfransı təşkil olunub.
"Football-plus.az" xəbər verir ki, millimizin məşqçisi Arif Əsədov oyunla bağlı fikirlərini bildirib. Sizi onun düşüncələri ilə tanış edirik:
"Sabah bizi ciddi rəqib gözləyir. Maraqlı oyun olacaq. Deyərdim ki, bu rəqib hardasa Millətlər Liqasında olan komandalara bərabərdi. Yaxşı sınaq olacaq. Sabahkı matçda həm oyun planında, həm heyətdə bəzi dəyişikliklər olacaq. Komandada atmosfer yaxşıdı. Çalışacağıq ki, yenə də yaxşı oynayıb, qalib gələk. Rəqibi analiz etmişik. Futbolçulara rəqibin güclü-zəif tərəflərini başa saldıq. Monqolustanla oyunla indiki arasında fərq olacaq. Biz də taktiki sxemdə dəyişiklik edəcəyik. Monqolustanı ən çox birinci zonada qarşılayırdıq. Bolqarıstanla matçda oyunumuzu ikinci zonada quracağıq. Biz də çalışacağıq ki, öz oyunumuzu göstərək. Müsbət emosiyalarımız var. 18-dən bu yana futbolçularla birlikdəyik. Futbol fəlsəfəmi qısa müddətdə oyunçulara aşılamağa çalışmışam. Düşünürəm ki, alınsa, istədiyimizi edə biləcəyik".
- Millidəkilər 25-28 yaşlı oyunçulardı, amma Monqolustanla matçda qapıya düşə bilmirdilər...
- Belə yanaşmağımızı istəməzdim. Bu, tək bizim futbolçulara aid deyil. Tanınmış oyunçularda da belə olur. Futbolçular hər epizoddan sonra heyfslənirdilər. Onlar da çox istəyirdilər. Sadəcə alınmırdı. Komandada inam var idi ki, qol vuracağıq.
- Sizcə, sabah A millidə baş məşqçi kimi son matçınızdı?
- Bu cür suallar çox verilir. Mən o barədə düşünmürəm. Millidəyəmsə, öz işimi görürəm və ona uyğun təcrübəmdən istifadə edirəm. Bu oyunlarda yaxşı nəticə əldə etmək istəyirəm. Mənim üçün vacib olan odu ki, yerli məşqçiləri təmsil edirəm. Çalışacam uğurlu nəticə olsun ki, kim gələcəksə görsün ki, bizim də yaxşı yerli məşqçilərimiz var.
- Sabah Rza Cəfərov qapıda olacaq, yoxsa Şahruddin Məhəmmədəliyev?
- Sabahkı matçda Şahruddini düşünürük. Rəqib də başqa səviyyədədi. Rzadan istifadə etdik ki, gənc oyunçu qazanaq. Düşündüm ki, Monqolustanla matçda təzyiq olmayacaq və o, daha rahat olacaq. Yusif İmanovdan Avstriya və İsveçlə görüşlərdə istifadə etdik. Orda ab-hava başqa idi. Rzanın işi az oldu, amma millinin ab-havasını gördü.
Digər xəbərlər
