“Təbii ki, “Baku Sportinq”i keçməyə qadirik” – “Füzuli” çempionluq istəyir
2-ci liqa təmsilçisi “Füzuli” mövsümün ikinci yarısına uğurlu başlayıb.
“Football-plus.az” xəbər verir ki, Füzuli təmsilçisi martın 5-dən bəri keçirdiyi hər üç görüşdən qalib ayrılmağı bacarıb və lider “Baku Sportinq”dən cəmi 3 xal geri qalır. Görəsən, bu uğur nəyin hesabınadı? “Füzuli”nin yeni hədəfi çempionluqdu? “Baku Sportinq”i keçə biləcəkmi? Bu suallara cavab tapmaq üçün klubun baş məşqçisi Nadir Əliyevlə əlaqə saxlamaq istəsək də, mütəxəssis cavab vermək istəmədi. Belədə suallarımızı klubun mətbuat xidmətinin rəhbəri Rauf İsgəndərli cavabladı:
“Qış fasiləsi zamanı, demək olar ki, komanda 70 faiz yeniləndi. Komandaya yeni futbolçular cəlb olundu. Mövsümün ikinci yarısı üçün də qarşımıza çempionluq hədəfi qoyulub. Liderlə 8 xal fərqini 3-ə qədər azaltmışıq. Növbəti tur “Ağdaş”, sonrakı turda isə “Baku Sportinq” ilə qarşılaşacağıq. Hər iki görüşdə qalib gəldiyimiz halda, birinci pilləyə yüksələcəyik. Komandanın yüksəlişinin səbəblərindən biri də daimi məşqlərdi. Həftə ərzində üç, bəzən də dörd məşq keçirik. Bunun nəticəsində də futbolçuların fiziki durumu artır. Həm də komandada birlik var. Təbii ki, “Baku Sportinq”i keçməyə qadirik. Həm də onlar ikinci yarıya uğursuz başlayıb, artıq 4 xal itiriblər. “Füzuli” isə qələbələri sıralayır”.
Xatırladaq ki, “Füzuli” 17 turdan sonra 38 xal toplamaqla turnir cədvəlinin 2-ci pilləsində qərarlaşıb.
KAMAL SƏFƏR
Digər xəbərlər
