Boksçular İtaliyadan bir lisenziya ilə dönüb
Boks yığmamız İtaliyanın Busto Arsizio şəhərində keçirilən 1-ci Dünya Olimpiya Təsnifat Turnirindən bir lisenziya ilə ayrılıb.
51 kq çəkidə qüvvəsini sınayan Nicat Hüseynov bütün rəqiblərinə qalib gələrək Fransa paytaxtında keçiriləcək Olimpiadada iştirak hüququ qazanıb. O, boks millimizin Parisə lisenziya əldə edən 3-cü təmsilçisidi. Nicata qədər Murad Allahverdiyev (80 kq) və Məhəmməd Abdullayev (+92 kq) buna nail olub. Qazaxıstanın 5, Özbəkistanın 4 lisenziya ilə qayıtdığı yarışdan biz 1 medal ilə qayıtdıq. Görəsən, bu enişin səbəbi nədi? Bu sualı Boks Federasiyasının mətbuat xidmətinin rəhbəri Tahir Hümmətov cavabladı:
“Komandamızın hesabında üç lisenziya var və təsnifat yarışları hələ bitməyib. Mayın 23-dən iyunun 3-dək Taylandda da analoji yarış keçiriləcək. Komandamızın orda da mübarizə aparacağını nəzərə alsaq, inanırıq ki, Paris-2024-ə vəsiqələrimizin sayı daha da artacaq. Hazırda ölkəmiz lisenziya sayına görə kişi boksçuların siyahısında dünyada 7-11-ci yerləri bölüşür. Beynəlxalq Boks Assosiasiyasına üzv olan 200-dən artıq ölkədən yalnız 44-ü buna nail olub. Hədəf Olimpiadaya bacardığımız qədər daha çox vəsiqə qazanmaq və yarışda ölkəmizin idman şərəfini layiqincə qorumaqdı”.
GÜNAY SÜLEYMANOVA
Digər xəbərlər
