“Bayer-04”lə cavab görüşünü nəzərə alan Qurban Qurbanov heyətdə müəyyən rotasiyalara əl atmışdı.

Amma bu məqam onu çempionluğa erkən nail olmaq hədəfindən yayındıra bilməz. Rəşad Sadıqovun məqsədi isə liderlər qrupundan uzaqlaşmamaq idi. İlk təhlükəli vəziyyəti də “Zirə”nin ifasında izlədik. Fuad Rəhimin tələsik ötürməsinə çata bilmədi. Belədə Abbas dərhal topu cərimə meydançasından uzaqlaşdırdı. Ardından Keyta Nərimanın ötürməsini dəyərləndirə bilmədi. Halbuki qapıya yaxın mövqedə qərarlaşan komanda yoldaşlarına şans verə bilərdi. Keyta bu səhvə 22-ci dəqiqədə də yol verdi. Bu dəfə top tirin üzərindən keçdi. İrəliləyən dəqiqələrdə “qartallar”ın varlığını hiss etmədik. 43-cü dəqiqədə Fuad hücum qurmaq istəyərkən Abbası keçə bilmədi, topu itirdi. “Köhlən atlar”ın müdafiəçsi dərhal qol axtarışında olan Nərimanı “gördü”. Son oyunların diqqətçəkən futbolçusu dərhal irəli atıldı. O, Ruanla Stefandan yayındı və Silvanın yerdə qalmasından istifadə edib boş qapını dəqiq nişan aldı.
İkinci hissə komandaların qarşılıqlı hücumlarıyla start götürdü. Əvvəl Diakabı təkbaşına hücuma keçdi. O, bu dəfə də ötürmə vermək əvəzinə bəxtini sınadı. Nəticədə top qapının üstündən keçdi. Növbəti hücum cəhdinin qolla bitməsinə isə Nərimanın ləngliyi səbəb oldu. O, Abbasın qapı önünə ötürməsinə başla zərbə endirmək istəsə də, topa çatmadı. “Qarabağ” çox keçmədən yenə fərqlənmək imkanı qazandı. Aleksey Almeyda - Elvin cütlüyünün başlatdığı hücumu Nərimana ötürməylə tamamladı. Sonuncu qapıya zərbə endirsə də, Tyaqo ona mane oldu. Qonaqların hücum cəhdindən isə Suma faydalana bilmədi. Rəhimin ötürməsindən sonra hücuma keçən qvineyalı hücumçu Almeyda ilə Maksimin arasından sıyrılıb “çərçivə”ni nişan aldı. Luka təhlükəni sovuşdurdu. Ardından Ceyhunun qapıya zərbəsi də hesabın bərabərləşməsiylə nəticələnmədi. “Qarabağ”ın hücum cəhdi isə rəqibin qapısına penalti təyin edilməsinə səbəb oldu. Abbas qapını nişan almaq istəyirdi, ancaq Ruan topa əllə müdaxilə etdi. Qayda pozuntusu hakimin gözündən yayınmadı. Belədə Almeyda 76-cı dəqiqədə fərqi artırdı. “Qartallar”ın qol axtarışı bundan sonra intensivləşdi. Ceyhun “Qarabağ”ın arxa xəttindəki boşluğu gördü və Meza Kolliyə ötürmə verdi, “Zirə”nin yeni transferi fərqi minimuma endirə bildi. Amma “qartallar”ın xal arzusu çin olmadı. Cəmi 2 dəqiqə sonra İsayev – Cica – Axundzadə - Diakabi kombinasiyası qolla tamamlandı. Avrokuboklara vəsiqə uğrunda mübarizə aparan “Zirə” durumunu çətinləşdirdisə, “Qarabağ” çempionluğa daha bir addım yaxınlaşdı. İndi liderlə ən yaxın izləyicisi arasındakı xal fərqi 24-ə bərabərdi.

Gözdən qaçmadı
* “Qarabağ Ordu” və “Qartallar” oyunboyu fəal olsa da, “İmarət Tayfa” ara-sıra varlığını bəlli edirdi.
* “Qarabağ” azarkeşləri “Qurban Qurbanov, bizi finala çıxar” şüarını səsləndirdi.
* Diakabi qolunu Qurban Qurbanovu qucaqlamaqla qeyd etdi.
* Oyunun sonuncu dəqiqəsində İsayevlə Çantakias arasında gərginlik yaşandı.
* “Qartallar” məğlubiyyətdən sonra, sadəcə, Tyaqo Silvanın adını səsləndirdi. Onlar Rəhim Sadıxovu səhvinə görə xeyli qınadı. Qəzəbli azarkeşləri Qismət Alıyev sakitləşdirdi.

KƏNAN BAHADIR