Misli premyer-liqasının 26-cı turunda “Qarabağ” “Zirə”ni məğlub edib - 3:1.

“Football-plus.az” xəbər verir ki, oyundan sonra qəsəbə təmsilçisinin baş məşqçisi Rəşad Sadıqovun mətbuat konfransı keçirilib. Sizi onun fikirləri ilə tanış edirik:

- Düşünmək olar ki, "Zirə" bundan sonra əsas diqqəti kuboka yönəldəcək?

- Turnir cədvəli hələ ki, yalnız kuboku düşünmək üçün şərait yaratmır. Önümüzdəki komanda ilə aramızda 1 xal fərq var. Növbəti tur bizim üçün olduqca vacibdi.

- Komandalar arasında xal fərqi çox azdı. Bu, komandalara təsir edir?

- Təbii ki. Həm psixoloji olaraq basqı altında saxlayır, həm də əlavə istəklə oynamağa vadar edir. Hər komandanın avrokuboklara vəsiqə qazanmaq imkanı var. Oyunların daha da gərgin keçməsi bununla bağlıdır. 26 turdan sonra "Qarabağ"dan başqa digər komandaların maksimum 10 qələbəsi var. Ümumiyyətlə çempionatda qələbə qazanmaq çox çətindir. Bu periodda oyununu qoruyub saxlayan, daha soyuqqanlı olan komanda daha uğurlu nəticə əldə edəcək. Çoxsaylı itkilərimiz var. Hücum xəttində oynatmağa oyunçumuz yoxdu.

- Sezar Meza Kolli qol vurdu. Onun komandaya faydası nə qədər olacaq?

- Əslində bu gün onun oynamağını planlaşdırmırdıq. Sadəcə olaraq oyun elə getdi ki, düşündük 15-20 dəqiqə ondan istifadə edək. Bir az riskli idi. Amma onun meydana girişi özünü doğrultdu. Meza Kollinin vaxta ehtiyacı var. Düşünürəm ki, qısa müddət ərzində öz formasını bərpa edər.

- “Zirə"nin fəxri prezidenti Orxan Məmmədovun AFFA prezidentliyinə namizəd olacağı gözlənilir. Sizin bu barədə fikirləriniz necədi?

- Mən o səlahiyyətdə insan deyiləm ki, AFFA prezidentliyini müzakirə edim. Mən məşqçiyəm. Oyunumuz, komandam haqda danışıram. Azərbaycan futboluna uğurlar arzulayıram, yeni prezidentimiz xeyirli olsun. Mənim bildiyim qədərilə Orxan Məmmədov namizədliyini irəli sürməyib və sürməyəcək.

- "Qarabağ" ölkə kubokunu qazansa, premyer-liqada 2-ci yeri tutan komanda Avropa Liqasına vəsiqə qazanacaq. Sizin hədəfiniz 2-ci yerdi, yoxsa 3-4-cü yerlər də qane edəcək?

- Gedişata baxacağıq. Bugünkü durumumuzda ən azı Konfrans Liqasına vəsiqə qazanmaq istəyirik. Amma hər komanda Avropa Liqasında oynamaq istəyər. Çünki, orda məğlub olacağını təqdirdə Konfrans Liqasına düşürsən. Hər şey gedişatdan asılıdı. Məsələn "Turan Tovuz"la oyunda qələbəyə köklənmişdik. Amma o qədər hadisələr baş verdi ki, 1 xalla ayrıldıq. Təbii ki, 13 turdan sonra 2-ci yeri istəyirdik. Amma bu gün turnir cədvəli elədir ki, 3-cü yer də, 4-cü yer də yaxşı sayılacaq.

- “Araz-Naxçıvan"ın baş məşqçisi Azər Bağırov mətbuat konfransında bildirib ki, hakimlər haqda danışan komandara simpatiya var. Siz bu fikirlə razısınız?

- Düşünmürəm ki, Azər Bağırov bizi nəzərdə tutub. Ad çəkilibsə, mənim fikir bildirməyim doğru olar. Bizim oyunlarda baş verən hakim səhvlərini hamı bilir. Bu da özünü turnir cədvəlində büruzə verir. Siz simpatiya hiss edirsiz? Mən bilmirəm. Keçən oyunda 40-cı dəqiqədən azlıqda qaldıq. Bu gün də qapımıza penalti var. Hələ simpatiya hiss etməmişik. Heç bunu istəmirik də. Bizə azarkeşlərin simpatiyası lazımdır. Hakimlərin kiməsə simpatiyası olmağa ixtiyarı yoxdur. İstəmirəm ki, əvvəlki səhvlərə görə bu gün mənim xeyrimə səhvlər olsun. Ədalətli hakimlik olsun.

- “Qarabağ"ın "Bayer"lə cavab oyunu haqda nə düşünürsünüz?

- Şans hər zaman var. Təbii ki, rəqib güclüdü. Hamımız istəyirik ki, "Qarabağ" mərhələni keçsin. Mən inanıram ki, "Qarabağ" mərhələni keçəcək. Qurban Qurbanova, komandaya baxdıqda o inam gəlir. Türkiyə, Rusiya klubu olsa, deyərdim ki, şansları yoxdu. İnanıram ki, "Qarabağ" həmin gün ən uğurlu oyununu keçirib hamımızı sevindirəcək.