“Gözlənilməz qol buraxdıq”
Misli premyer-liqasının 21-ci turunda “Zirə” “Qəbələ” ilə qarşılaşıb - 1:1.
“Football-plus.az” xəbər verir ki, oyundan sonra qəsəbə təmsilçisinin çalışdırıcısı Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:
"Qəbələ səfəri hər komanda üçün ağırdı. Qələbə qazanmaq istəyirdik. Meydanda amansız mübarizə gedirdi. Hər iki komanda çox istəkli idi. Matça pis başlamadıq, oyuna biz nəzarət edirdik. Gözlənilməz qol buraxdıq. Sonra qol vurduq və nəzarəti əldə aldıq. İkinci hissədə hücum potensialını daha da gücləndirdik. Lakin istədiyimiz qolu vura bilmədik. İki epizodda rəqib qapıçı etibarlı oynadı. Bu cür oyunda, Qəbələ səfərində bir xal pis nəticə deyil. Qarşıda "Səbail"lə çox vacib oyun bizi gözləyir. Ona hazırlaşacağıq”.
- Ülvi İsgəndərov ikinci dəfədi ki, "Zirə"yə uzaq məsafədən qol vurur. Həmin qolu necə şərh edərdiniz?
- Demirəm Ülvi bizə qarşı xüsusi motivasiya ilə oynayır. Amma artıq alışmışıq. Bizimlə hər oyunda ya qol vurur, ya məhsuldar ötürmə edir. Təəssüf ki, belə qol buraxdıq. Oyundan öncə bu haqda danışmışdıq. Amma Ülvinin usta vuruşuna qiymət vermək lazımdı.
- Matçın 70-ci dəqiqəsində ehtiyat oyunçular skamyası tərəfdə gərginlik yaşandı. Orda nə baş vermişdi?
- Anlaşılmazlıq var idi. Əsas odu ki, problem aradan qalxdı.
- Hakimin idarəçiliyindən razı qaldız?
- Bəyəndim deyə bilmərəm. Mənə ədalətli hakimlik lazımdır. Ümumən bu gün foullar çox idi. Tez-tez qayda pozuntuları olurdu. Ümumiyyətlə, "Qəbələ" ilə buradakı oyunlarımız həmişə aqressiv keçir. Amma indi onların vəziyyəti elədi ki, hər rəqibə qarşı bu cür yanaşırlar. Bu, başadüşüləndir, çempionatın gərgin dövrüdü, hamı qələbə qazanmaq istəyir.
- Klublar Komitəsinin Barış Şimşəklə görüşü oldu. Sizcə, bu görüşdən sonra hakim səhvləri azalacaq?
- Barış Şimşəkin işinə qiymət vermək istəmirəm. Bizim 5-6 yaxşı hakimimiz var. Hakimliklə bağlı etirazlarımız odur ki, aydın epizodlar idi. Bəzən VAR susur, belə epizodlar adamı məyus edir.
- Rüstəm Əhmədzadə nə vaxt yaşıl meydanlara qayıdacaq?
- Ən azı bir ay komandadan ayrı qalacaq. Çox ağır zədə alıb.
- Veteran futbolçu Mahir Şükürov sizin təkləndiyinizi deyib. Bu fikirlə razısız?
- Təklənmişəm deməzdim. Ötən mətbuat konfransında bu haqda danışdım. Yenidən qayıtmaq istəmirəm. Bir çox hadisələr futbol camiəsinin gözünün qabağında baş verir. Ümid edək ki, nə bizim, nə də digər komandaların əleyhinə qərarlar olacaq. Çünki, bir səhv ilin sonunda çox ağır nəticələrə səbəb olur.
Digər xəbərlər
