Qətər Futbol Federasiyası milli komandanın baş məşqçisi ilə bağlı yekun qərarını açıqlayıb.

Bu vəzifəyə Bartolome Markesin növbəti təyinatı təsdiqlənib.

Federasiyanın mətbuat xidmətinin məlumatına görə, onun bir neçə həftə əvvəl qazandığı böyük uğur statusunun dəyişməsinə şərait yaradıb. Milli komanda fevralın 10-da Asiya Kubokunun finalında İordaniyaya qalib gələrək (3:1) turnirin çempionu olmuşdu. Qətərlilərin titulu qorumaqla qitə çempionatında ikinci dəfə qalib gəldiklərini də bildirək. Xatırladaq ki, qitə çempionatına təxminən bir ay qalmış – ötən il dekabrın sonunda yığmanın baş məşqçisi Karluş Keyruş istefaya göndərilmişdi. Məşhur portuqaliyalının səlahiyyətləri müvəqqəti Markesə həvalə edilmişdi. İspaniyalı mütəxəssis artıq baş məşqçi vəzifəsini daimi əsasda icra edəcək. Federasiya onunla müddəti 2026-cı ilə qədər nəzərdə tutulan yeni müqavilə bağlayıb.

1982-88-ci illərdə formasını geydiyi “Espanyol”da 1998-ci ildən 2008-ci ilədək yeniyetmələrin məşqçisindən əsas komandaya qədər yol qət edən mütəxəssisin 62 yaşı yanvarın 7-də tamam olub. İspaniyada “Kastelyon”u, Belçikada “Eypen” və “Sent-Trüden”i çalışdıran Markes 2018-23-cü illərdə “Əl-Vakra”ya başçılıq edib. Qətər millisinə dekabrın 6-da təyinat alan ispaniyalı bu komanda ilə 9 oyunda 7 qələbəyə sevinib və yalnız bir dəfə uduzub. Yeri gəlmişkən, yığma DÇ-2026-nın seçmə turnirində keçirdiyi hər iki matçda qalib gəlib.