Fevralın 10-da Qətərdə keçirilən 18-ci Asiya Kubokuna (AK) yekun vuruldu.

“Football-plus.az” xəbər verir ki, şənbə günü Lusail şəhərində keçirilən final oyununda İordaniyaya qalib gələn Qətər yığması çempion titulunu qorudu.

final
İordaniya – Qətər 1:3 (0:1)
İordaniya: Layla, Əl-Ərəb, Nəsib, Həddad, Əl-Acalin, Əl-Mardi (Rateb, 80), Əl-Raşdan, Əl-Ravabdeh, Oluan (Həmməd, 90+5), Əl-Tamari, Əl-Naymat.
Qətər: Barşam, Abdurisaq (Məhəmməd, 63), Salman, Əlməhdi Əli (Xuxi, 81), Mendes, Vaad, Fəthi, Abdulsallam (Hatəm, 52), Əl-Haydos (Assadalla, 52), Afif, Almoez Əli.
Qollar: Afif, 22-p. (0:1). Əl-Naymat, 67 (1:1). Afif, 73-p. (1:2). Afif, 90+5-p. (1:3).
Vərəqələr: Oluan, 18. Əl-Acalin, 45+7. Əl-Naymat, 86. Assadalla, 90+9. Barşam, 90+16 - sarı.
Hakim: Ma Nin (Çin).
10 fevral. Lusail. 86492 tamaşaçı.

Finalçıların bu tərkibdə olacağı heç gözlənilmirdi. Söhbət, təbii ki, İordaniyanın həlledici mərhələyə qədər irəliləməsi kimi sensasiyadan gedir. Bəhreyn və Malayziyanın da yarışdığı qrupda 3-cü yeri tutmaqla tarixində ilk dəfə pley-offa adlayan bu komanda 1/8 finalda İraqa (3:2), 1/4 finalda isə qitə çempionatının debütantı olan Tacikistan yığmasına (1:0) qalib gəlməklə özünün daha iki rekordunu müəyyənləşdirmişdi. Hüsseyn Ammutanın çalışdırdığı komanda yarımfinalda turnirin əsas favoritlərindən birinə çevrilən Koreyanı da mübarizədən kənarlaşdırmışdı (2:0). İordaniyalılar finala çıxmaqla tarixində daha bir rekorda nail olsalar da, finalın autsayderi idilər. Niyə? Bu sualın çox sadə cavabı vardı: əvvəla onlar qitə birinciliyinin son qalibinə qarşı oynayacaqdılar, ikinci ciddi amil isə Qətərin ev sahibi rolunda çıxış etməsi idi.

İlk dəqiqələrdən təşəbbüsə yiyələnən qətərlilərin hücumları 22-ci dəqiqədə bəhrə verdi: Afif penalti ilə hesabı açdı. Maraqlıdı ki, meydan sahibləri bundan sonra sanki bilərəkdən topu rəqibə verməyə başladılar. İordaniya yığması hissənin ikinci yarısında topa böyük ölçüdə nəzarət etdi. Ancaq Ammutanın komandası qətərlilərin qapısı qarşısında nadir hallarda təhlükəli vəziyyət yarada bildi.

Fasilədən sonra bu planda yetərincə “artıran” iordaniyalılar bir neçə dəfə hesabı bərabərəşdirmək imkanı qazandılar. Lakin Barşam qısa müddətdə qapısını üç dəfə real qoldan xilas etdi. Amma o, 67-ci dəqiqədə Əl-Naymatın zərbəsini dəf edə bimədi. Hesabın bərabərləşməsi ev sahiblərini yenidən təşəbbüsü ələ almağa vadar etdi. Çox keçmədən oyunun ən yaxşısı sayılan Afif növbəti penalti komandasını yenidən hesabda önə keçirdi. Son dəqiqələrdə daha bir belə şansı qaçırmayan hücumçu 8 qolla turnirin ən yaxşı bombardiri oldu. Bartolome Markesin çalışdırdığı Qətər yığması 2019-cu ildə qazandığı ilk qitə çempionluğu titulunu qorudu!

Bombardirlər: Afif (Qətər) - 8, Hüsseyn (İraq) – 6, Ueda (Yaponiya) - 4.