Dieqo Qodin bir neçə ay əvvəl verdiyi qərarını dəyişib. Məşhur uruqvaylı futbolçu karyerasını bərpa edib.

O, ötən ilin yayında “Veles Sarsfild”də peşəkar futbol həyatına son qoyduğunu bəyan etmişdi. Lakin yenidən yaşıl meydana çıxmaq qərarına gəlib. Fevralın 16-da 38 yaşı tamam olan müdafiəçi ölkəsinin “Poronqos” klubu ilə anlaşıb. Qodinin imzaladığı müqavilənin detalları haqda məlumat verilmir.
“Defensor”un yetirməsi olan Dieqo peşəkar karyerasına 2003-cü ildə Uruqvayda başlayıb. Vətənində “Serro” və “Nasyonal”ın formasını geyib. 2007-ci ildə Avropaya gələn futbolçu “Vilyarreal”, “Atletiko”, “İnter” və “Kalyari”də çıxış edib. 2022-ci ildə bir neçə ay Braziliyada top qovan uruqvaylı “Atletiko Mineyro”da oynayıb və həmin il Argentinaya - “Veles Sarsfild”ə üz tutub.

Onun karyerasının ən uğurlu dövrü “Atletiko” ilə bağlıdı. 9 il (2010-19) şərəfini qoruduğu İspaniya klubu ilə İspaniya La Liqası (2014), Avropa Liqası (2012, 2018) və Avropa Superkubokunun (2010, 2012, 2018) qalibi olub. Uruqvay yığmasında 161 oyun keçirməklə rekord müəyyən edən Dieqo milli komanda ilə 2011-ci ildə Amerika Kubokunda qalib adını qazanıb.