“Neftçi”, “Turan Tovuz”, “Sabah”, “Səbail”dən sonra “Sumqayıt” da Türkiyədə keçirdiyi təlim-məşq toplanışını başa vurdu və vətənə qayıtdı.

Yanvarın 6-da Antalyaya yollanan “gənclər şəhəri” təmsilçisinin qış fasiləsində iki yoxlama oyunu keçirəcəyini yazmışdıq. Xatırladaq ki, komanda ilk görüşdə “Hermanştadt”la üz-üzə gəlmiş və meydandan məğlub ayrılmışdı. Daha dəqiq desək, Rumıniya superliqasında 21 qarşılaşmadan sonra 29 xalla turnir cədvəlinin 7-ci pilləsində qərarlaşan sınaqçı-rəqib “kimyaçılar”ı darmadağın etmişdi – 3:0. Samir Abasovun komandası srağagün ikinci matçda “Soqdiana” ilə qarşılaşdı. Maraq üçün qeyd edək ki, Özbəkistanda mövsümlərarası fasilədi. Və bu ölkənin təmsilçisi “Soqdiana” ötən “futbol ili”ni 27 xalla turnir cədvəlinin 11-ci pilləsində bitirib. Çempionatda 14 klub iştirak edir.

Abasovun bu rəqiblə oyun üçün seçdiyi start heyət: Mehdi Cənnətov, İsa Suliman, Rövlan Muradov, Səbuhi Abdullzaadə, Erik Sorqa, Kasimir Ninqa, Abu Dosso, Elvin Bədəlov (k), Murad Xaçayev, Roy Kehat, Masaki Musaka.
Ehtiyat oyunçular: Orxan Sadıqlı, Murad Ağamalıyev, Nemət Şixəmirov, Kamran Əliyev, Tural Axverdiyev, Ayxan Süleymanlı, Nihad Əhmədzadə, Kamran Quliyev, Sənan Muradlı, Uğur Cahangirov, Tresor Mossi, Nahid Orucov.

Matç başlar-başlamaz komandaların qarşılıqlı hücum cəhdlərinin şahidi olduq. Tərəflər ilk dəqiqələrdə bir-birinin gözünü qorxutmağa çalışırdı. Lakin “Sumqayıt”ın daha inadkar və cəsarətli oyun sərgilədiyini qeyd etməliyik. “Kimyaçılar” ilk qol imkanlarını boşa versələr də, 35-ci dəqiqədə özbəklər topu meydandan çıxardığından künc zərbəsi təyin olundu. İsa Rövlanın göndərdiyi topu baxımlı zərbə ilə qapıdan keçirdi. Növbəti dəqiqələrdə “Soqdiana” müqavimət göstərməyə çalışsa da, Samir Abasovun yetirmələri buna şərait yaratmadı. Onlar 2-ci hissədə bir qədər yorğun görünsə də, matçın “ipini əldən buraxmaq” niyyətində deyildi. Demək olar ki, bütün futbolçular epizodlarda fəal iştirak edir və fərqlənməyə çalışırdı. Amma bunu ilk qolda məhsuldar ötürmə verən Rövlan bacardı. O, Muratanın ötürməsindən sonra 57-ci dəqiqədə fərqi ikiyə çatdırdı. Nəticədə “Soqdiana”nın yuxarıda bəhs etdiyimiz oyun tərzi daha da aqressivləşdi ki, Ayxan zədələnməyə yaxın oldu. Yaxşı ki, rəqibin güclü ayaq zərbəsiylə yerə sərilən futbolçunun bəxti gətirdi. Çox keçmədən rəqibin qapıçısı eyni davranışı Murataya qarşı sərgilədi ki, bu dəfə həkim müdaxiləsinə ehtiyac duyuldu. Beləliklə, yaponiyalı yarımmüdafiəçi meydanı tərk etməli oldu.

Növbəti epizodların birində isə Mossi rəqibə qarşı kobud oynadı ki, hakim “Sumqayıt”ın qapısına cərimə zərbəsi təyin etdi. Bu epizodda Mehdi sola atılıb topu sahibləndi. 69-cu dəqiqədə “Sumqayıt” 3-cü qolu da vurdu. Ninqa topla birgə qapı önünə qədər gəldi və rəqib müdafiəçilər tərəfindən mühasirəyə alındığından Ayxana ötürmə verdi. Ayxan əlverişli mövqedə olan Kamranı “gördü” ki, 23 yaşlı hücumçu asanlıqla komandasının üçüncü qolunun müəllifi oldu. “Soqdiana” daha çox müdafiə olunur, topu ələ keçirdiyi epizodlarda təkbətək mübarizədə məğlub olaraq geri çəkilirdi. Amma özbəklər son dəqiqələrdə penalti sayəsində qollardan birinin əvəzini çıxdı.

KƏNAN BAHADIR