“Turan Tovuz”la oyunda, məncə, hakimlərin böyük səhvi var idi”
Oyundan sonra “Araz-Naxçıvan”ın liderlərindən Turan Manafovla danışdıq.
"Çempionatda da uduzurduq, kubokda da məğlub olmuşduq. Ona görə də bu qələbə bizim üçün çox vacib idi. “Neftçi” çox yaxşı komandadı və bizdən də yuxarı pillədə qərarlaşıb. Biz də daha çox əziyyət çəkdik, oyuna daha yüksək motivasiya ilə çıxdıq və əlimizdən gələni etdik. Qələbəyə görə baş məşqçimizdən azarkeşlərimizə qədər hər kəsi təbrik edirəm. Belə çətin qələbələr adama daha şirin gəlir".
- Həm kubok, həm də çempionat daxil olmaqla 7 oyun idi qələbə qazana bilmirdiz. Bu oyunla həmin tilsimi qırdız. Bunu nə ilə əlaqələndirərsən?
- İstəməzdik ki, 7 oyunumuz belə olsun. Hər şey özümüzdən asılıdı. Bəzi matçlarda çox zəif çıxış etdik, bəzilərində isə istədiyimiz qolları vura bilmədik. Məsələn, “Qəbələ” ilə oyunda qələbə qazana bilərdik, ancaq şansımız gətirmədi. “Sumqayıt”la oyun 90 dəqiqə bizim üstünlüyümüzlə keçdi, sadəcə, bir əks-hücuma çıxdılar və qol oldu. “Turan Tovuz”la oyunda, məncə, hakimlərin böyük səhvi var idi. Xüsusən də birinci qolda. Yəni elə oldu ki, həm hövsələsizlik, həm bəxtsizlik, həm də bəzi şeylər bizi gətirib bu yerə çıxartdı. Amma şükürlər olsun ki, nəhayət, qələbə qazandıq. İnanıram ki, bu, yenidən toparlanmaq üçün başlanğıc olacaq. Növbəti turlarda yenə çətin görüşlər olacaq. Qələbələr qazanmaq üçün çalışıb-vuruşacağıq.
- Orxan zədəli olduğu vaxt kapitan sarğısını Kurdiç daşıyırdı. Amma Orxan əvəzlənərkən bu sarğını sənə təqdim etdi. Bunu necə şərh edərsən?
- Mən sarğının Vadimə verilməsini istədim, çünki o məndən böyükdü. Sadəcə, elə oldu ki, mənə verildi. Məncə, kapitan sarğısı bir önəm daşımır. Sadəcə, bu məşqçilərin fikridi, kimə tapşırılırsa, ona verilir. Bu özəl bir şey deyil.
KAMAL SƏFƏR
Digər xəbərlər
