Debütdə Çexiyanı məğlub edən voleybol yığmamız 2-ci oyunda meydan sahibi almanlara 1:3 (13:25, 22:25, 25:12, 14:25) uduzdu.

Oyundan sonra yığmanın kapitanı Ayşən Abduləzimova "Football-plus.az"ın suallarını cavablayıb.

- 2 və 4-cü setlərdə yaxşı çıxış etdiz. Lakin sonda məğlub olduz. Komandada nə çatmadı?
- Bəli, 2-ci setə yaxşı başladıq, amma öz səhvlərimizə görə seti uduzduq. Bu setdə qalib gəlsəydik, oyunu da qazana bilərdik. Rəqib yaxşı servislər atdı, daha az səhvlər etdi.

- Çexiyaya qalib gəlsəz də, bir çoxları əsas gücünüzün Almaniya ilə oyunda bilinəcəyi fikrindəydi. Sənin bu fikrə münasibətin necədi?
- Almaniya ev sahibidi və böyük azarkeş dəstəyi var idi. Biz də çalışdıq ki, yaxşı nəticə göstərək, lakin olmadı. Çexiya üzərində qələbə bizi arxayınlaşdırmayıb, sadəcə, bu gün çox səhv etdik və təəssüf ki, məğlub olduq.

- Növbəti oyun Türkiyəyə qarşıdı. Bu oyundan nə gözləyirsən?
- Türkiyə hazırda qrupumuzun ən güclü komandasıdı. Buna baxmayaraq, çalışacağıq ki, komanda şəklində daha yaxşı oynayaq, boşluqları aradan qaldıraq.

- Bu qrupdan çıxa biləcəksiz?
- İnşallah. Qarşıda üç oyunumuz var. Əlimizdən gələni edəcəyik ki, bugünkü səhvləri təkrarlamayaq, daha yaxşı oynayaq.

CAVİD ƏLİYEV