“Səbail”in ev oyunlarını keçirdiyi “ASCO Arena”nın işıqlandırma problemi həllini tapıb. Misli premyer-liqasının 14-cü turundan bəri transformatorda yaranan problem üzündən klubun ev oyunlarını yalnız gündüz vaxtı keçirməsindən xəbərdarsız. Bununla bağlı klubun mətbuat xidmətiylə bir neçə dəfə əlaqə saxlasaq da, transformatorun təmirinin davam etdiyini və bu prosesin konkret hansı tarixdə yekunlaşacağının bəlli olmadığını demişdilər. Amma çempionatın 23-cü turu çərçivəsində “Araz-Naxçıvan”la ev oyunu 19.30-a təyin edildiyindən problemin həll olunduğunu düşündük. Yenə də işimizi təxminə saxlamayıb, dəqiqləşdirmək üçün “Səbail”in media və marketinq şöbəsinin rəhbəri Rəşad Məmmədovla danışdıq: “Bəli, işıqlandırılma problemi həll olunub. “Araz-Naxçıvan”la keçiriləcək qarşılaşma üçün heç bir problem yoxdu”.
KAMAL SƏFƏR