Karlos Karvalyal heç cür Fatih Terim lənətinə son qoya bilmir.

Bu iki mütəxəssisin yolu hələ 2011/12-də kəsişmişdi. O vaxt Karvalyal ''Beşiktaş''ı Terim isə ''Qalatasaray''ı çalışdırırdı. O dönəmdə ''Qartal'' ''Cim-Bom'' ilə evdə qolsuz bərabərliklə kifayətlənmişdisə, səfərdə 2:3 hesabı ilə məğlub olmuşdu. Karvalyal səfərdəki məğlubiyyətdən təxminən 1 ay sonra istefaya göndərilmişdi.

Bu iki məşqçinin yolu bu dəfə illər sonra Yunanıstanda kəsişdi və yenə hər şey Karvalyalın istefası ilə nəticələndi! 58 yaşlı mütəxəssis dekabrın əvvəllərində Yunanıstanın ən titullu klubu ''Olimpiakos''un başına keçmişdi. Dekabrın sonlarında bilindiyi kimi Terim ''Panatinaikos''un başına keçməklə yenə Karvalyala rəqib oldu. Onlar əvvəlcə ölkə kubokunun 1/8 finalında üz-üzə gəldilər. Hər iki oyun heç-heçə başa çatdı və Terimin komandası penaltilər seriyasına üstün olaraq mərhələni adladı. Əzəli rəqiblər ən son ötən həftəsonu Yunanıstan çempionatının 21-ci turunda qarşılaşdı.

''Panatinaikos'' öz meydanında 2 cavabsız qolla üstün oldu. Bu məğlubiyyətdən sonra ''Olimpiakos''la lider PAOK arasında xal fərqi 9-a yüksəldi. Belə görünür, bu, Karvalyalın ''Olimpiakos''un başındakı son oyunu olacaq. Çünki Yunanıstan mətbuatında onun istefa məsələsinin artıq həll olunması barədə xəbərlər yayılıb. Hazırda təzminat ilə bağlı danışıqlar gedir. Rəsmi açıqlamanın ən qısa müddətdə veriləcəyi gözlənilir. ''Olimpiakos'' Karvalyalın dönəmində keçirdiyi 11 rəsmi oyundan 5 qələbə, 3 heç-heçə, 3 məğlubiyyətlə ayrılmış oldu. Komanda qələbəyə həsrət qaldığı 6 qarşılaşmadan 3-nü ''Panatinaikos''a qarşı keçirmiş oldu. Ümumiyyətlə, Karvalyal məşqçi karyerasında Terimə qarşı keçirdiyi 5 görüşün hamısında qələbəyə həsrət qalıb! Şayiələrə inansaq, ''Olimpiakos'' rəhbərliyi Karvalyalı 2020-ci ildən bu yana ''Alkmaar''ı çalışdıran Paskal Yansen ilə əvəzləmək istəyir.

ƏLİ