Gəncə akademiyası AFFA-nı gözləyir, bəs AFFA nəyi gözləyir?
Xatırlayırsızsa, yanvarın 11-də AFFA İcraiyyə Komitəsinin iclası və Gəncə Futbol Akademiyasının açılışı baş tutacaqdı.
Lakin AFFA-nın prezidenti Rövnəq Abdullayevin sağlamlıq durumunda yaranan problemlə bağlı həmin tədbirlər təxirə salındı.
Daha sonra AFFA-nın baş katibi Sərxan Hacıyev Misli premyer-liqasının 20-ci turunun “Turan Tovuz” – “Səbail” (3:1) matçını izləmək üçün Tovuza yollandı. Matçdan sonra jurnalistlərin sullarını cavablayan qurum rəsmisi bu məsələylə bağlı son durum haqda bunları dedi:
“Səfər fevralın ilk günləri üçün planlaşdırılır. Ancaq hansı tarixdə olacağı dəqiq bilinmir”.
Konkret tarixin bəlli olub-olmadığını öyrənmək məqsədilə AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədli ilə əlaqə saxladıq. O, “Football-plus.az”a hələ ki bu yöndə yekun qərarın verilmədiyini, ancaq Sərxan bəyin dediyi kimi, bu yaxınlarda tədbirlərin baş tutacağını bildirdi.
Bundan başqa, “Kəpəz”in mətbuat katibi Azad Mustafayev saytımıza bildirdi ki, Futbol Akademiyasıyla bağlı bütün işlər tamamlanıb. Yəni qurğu fəaliyyət göstərmək üçün tam hazırdı. Amma açılış üçün AFFA rəhbərliyinin səfəri gözlənilir. Eybi yox, bir az da gözləyək...
KƏNAN BAHADIR
