“Hər şey iki-üç günüm içində oldu. Doğrusu, burda çalışmaq planım yox idi. Yenə menecer fəaliyyətimə davam etmək istəyirdim. Doğrudu, menecerlik fəaliyyətimlə yanaşı, “Cəbrayıl”a da yardım göstərirdim. Belə deyim, “Qəbələ”dən dəvət gəldi, mən də qəbul etdim. Dəvət alanda da cavabım belə oldu ki, mənim köməyim lazımdısa, həmişə hazıram. Vaxtilə burda işləmişəm, bura mənə yad klub deyil. Xüsusən rəhbərliklə münasibətlərimiz çox yaxşıdı. Eləcə də komanda üzvləri, məşqçilər ilə eyni münasibətimiz var. Ona görə də fikirləşdim ki, bura gəlməyimi lazım bilirlərsə, komandanın belə çətin vəziyyətində kömək göstərməkdən imtina edə bilmərəm. Bu səbəbdən də təklifi qəbul etdim. Bundan sonra “Cəbrayıl”la münasibətlərə gəlincə, çox güman, qısa müddətdə kömək edəcəm. Amma bütün planlarım “Qəbələ” ilə bağlı olacaq. İndi “Cəbrayıl”a, sadəcə, azarkeşlik edirəm”.

“Komanda sonuncu pillədə qərarlaşıbsa, deməli, problemləri var. Ancaq “Neftçi” ilə sonuncu matç göstərdi ki, komanda rəqiblərindən heç də geri qalmır. “Sumqayıt”la görüşdə də pis təsir bağışlamamışdılar. Sadəcə, oyunun qırılma nöqtəsi təyin olunan penalti ilə bağlıdı. Eyni zamanda, “Neftçi” ilə oyunda da həm penaltinin, həm də qırmızı vərəqənin olması qarşılaşmanın qırılma nöqtəsi oldu. “Neftçi” ilə oyunda bir neçə qol imkanından yararlana bilmədilər. Futbolçuların tələskənliyi və özünəinamın yetərincə olmaması buna səbəb oldu. İndi komandanın əsas problemi bununla bağlıdı. Məğlubiyyətlər sıralandıqca komandada özgüvən itir. Hər oyunçuda xarakter fərqlidi. Kimisi xaraktercə zəifdi, kimisi güclüdü. Özünəinamın itməsi getdikcə qalan futbolçulara da təsir göstərir. Beləliklə, indiki mənzərə ortaya çıxır. Yəni indi komandada hansısa böyük problem yoxdu, hər şey qaydasındadı. Ona görə də komandaya, oyunçulara, sadəcə, özünəinamı qaytarmaq lazımdı”.