İtaliya futboluna ağır itki üz verib. Luici Riva yanvarın 22-də 79 yaşında vəfat edib.

Bir neçə gün əvvəl futbol veteranının ürəktutması keçirdiyi haqda xəbər yayılmışdı. Xəstəxanada Rivanın vəziyyəti sabitləşsə də, səhhəti qəfildən pisləşən sabiq fubolçu bazar ertəsi axşam saatlarında dünyasını dəyişib. O, karyerası ərzində iki klubun – “Lenyano” (1962-63) və “Kalyari”nin (1963-76) formasını geyib.

“Kalyari” ilə 1969/70 mövsümündə ölkə çempionluğunu qazanan hücumçu 207 qolla klubun ən yaxşı bombardiridi. Riva 1965-74-cü illərdə çıxış etdiyi milli komandanın da ən yaxşı bombardiridi: “skuadra adzurra”nın forasında meydana çıxdığı 42 oyuna 35 qol vurub. Onun İtaliya millisi ilə 1968-ci ildə keçirilən Avropa çempionatının qalibi, iki sonra isə dünya çempionatının gümüş mükafatçısı olduğunu da bildirək.