Kuareşma karyerasını bu klubda bitirmək istəyir
Portuqaliyalı ulduz Rikardo Kuareşma karyerası ilə bağlı yeni açıqlama verib.
“Football-plus.az” xəbər verir ki, belə ki, 40 yaşında olmasına baxmayaraq o, yaşıl meydanlara geri qayıdaraq futbolla aktiv şəkildə vidalaşmaq istədiyini vurğulayıb. Karyerasında son matçını 2022-ci ilin mayın 15-də keçirən Kuareşma futbola hələ tam olaraq nöqtə qoymadığına və ''Beşiktaş''ın heyətində futbolla vidalaşmaq istədiyinə işarə vurub. Son dönəmlərdə ulduz vingerin İstanbul nəhənginə geri dönəcəyi ilə bağlı bir çox şayiələr yayılmışdı. Portuqaliyanın ''Rekord'' nəşrinə açıqlamalar verən Kuareşma bunları deyib:
''Karyeramı meydanda bitirmək istədiyimi hər zaman söyləmişəm. Gözləyək görək, nələr olacaq. Bir şey dəqiqdi ki, karyeramı hələ nöqtələməmişəm. Mümkün variantlardan biri də ''Beşiktaş''dı. Niyə də olmasın? Mənim üçün doğma və sevdiyim bir klubdu. Ailəm də Türkiyədə hər zaman özünü rahat hiss edirdi. Nə olacağını bilmirəm''.
Qeyd edək ki, vaxtilə ''Sportinq'', ''Portu'', ''Barselona'', ''İnter'', ''Çelsi'' kimi klublarda top qovmuş, eləcə də Portuqaliya yığması ilə AÇ-2016-nı qazanmış Kuareşma ''Beşiktaş''da iki fərqli dönəmdə çıxış edib. O, İstanbul nəhəngində 2010-12 və 2015-19-cu illərdə ümumilikdə 227 rəsmi oyunda 38 qol, 77 məhsuldar ötürməlik performans sərgiləyib.
ƏLİ
