Tariximizin həm faciəvi, həm də qəhrəmanlıq səhifələrindən olan 20 Yanvar hadisələrindən 34 il ötdü.

Ölkəmizin futbol klubları da bu olaya biganə qalmadı, sosial şəbəkə hesabında uyğun paylaşımlar etdi.

"Qarabağ": Şərəf və qürur günümüz!

1990-cı il 20 Yanvar faciəsi Azərbaycanın tarixinə öz suverenliyi uğrunda rəşadət göstərdiyi gün kimi həkk olunub. Xalqımızın tarixində şərəfli səhifə açmış şəhidlərimizi böyük ehtiramla yad edirik.

"Neftçi": Milli oyanışımızın başlanğıc nöqtəsi olan 20 Yanvar günü vətənimizin azadlığı uğrunda canından keçmiş bütün soydaşlarımızı dərin hüznlə yad edirik!

"Sabah": Bu gün 20 Yanvar faciəsindən 34 il keçir. Düz 34 il öncə - 1990-cı il yanvarın 19-dan 20-nə keçən gecə Sovet ordusu imperiyanın qərəzli siyasətinə etiraz edən, azadlıq uğrunda ayağa qalxmış xalqımıza qarşı qətliam törətdi. Bu faciə Azərbaycan xalqının tarixinə azadlıq və qəhrəmanlıq səlnaməsi kimi əbədi həkk olundu. İllər keçsə də, xalqımız öz qəhrəman övladlarının xatirəsini daim yaşadır. Şəhidlərimizin əziz xatirəsini ehtiramla anırıq!

"Səbail": Şəhidlərimizin əziz xatirəsini dərin ehtiram və hüznlə anırıq!

"Qəbələ": Bu gün Azərbaycan tarixinə Qanlı Yanvar faciəsi kimi daxil olmuş 1990-cı il 20 Yanvar hadisələrinin ildönümüdü. Allah şəhidlərimizə rəhmət eləsin!

"Turan Tovuz": 20 Yanvar şəhidlərimizin əziz xatirəsini qürur və ehtiramla anırıq!

"Zirə": 20 yanvar – Qanlı yanvar gecəsi! 1990-cı ilin yanvarında keçmiş SSRİ rəhbərliyinin Azərbaycanla bağlı apardığı qərəzli siyasətə etiraz əlaməti kimi küçələrə çıxmış dinc əhaliyə divan tutmaq məqsədilə Bakıya və respublikanın digər rayonlarına sovet hərbi hissələri yeridildi.

20 Yanvar hadisəsi Azərbaycan xalqının yaddaşına qanlı faciə kimi daxil olsa da, bütövlükdə milli tarixin ən şanlı və qəhrəmanlıq səhifələrindən birini təşkil edir. Mübarizəyə qalxmış bir xalq 1990-cı il yanvarın 19-dan 20-nə keçən gecə sovet xüsusi təyinatlı hərbi dəstələri, pozuculuq-təxribat işlərini təşkil edən çevik qrupları ilə üzləşdi...

Görünməmiş qəddarlıqla keçirilən cəza tədbirləri nəticəsində heç bir günahı olmayan 133 dinc sakin öldürüldü, 744 nəfər yaralandı, 841 nəfər qanunsuz həbs olundu. Həlak olanların arasında qadınlar, uşaqlar və qocalar olub. Bu hadisə sovet rejiminin törətdiyi ən qanlı faciələrdən biri və dinc əhaliyə qarşı yönəlmiş vəhşi bir cinayət hadisəsi idi.

"Kəpəz" - 20 Yanvar Azərbaycan xalqı üçün unudulmaz tarixdi.

"Araz Naxçıvan": 20 yanvar ümumxalq hüzn günüdü. 1990-cı il yanvarın 19-dan 20-nə keçən gecə törədilmiş faciəvi hadisədən 34 il ötür. Allah bütün şəhidlərimizə rəhmət eləsin.

"Sumqayıt": 20 Yanvar faciəsindən 34 il ötür. Xalqımız bu gün qanlı yanvar faciəsinin 34-cü ildönümünü qeyd edir. 1990-cı il yanvarın 19-dan 20-nə keçən gecə böyük itkilərlə, günahsız insanların qətli ilə nəticələnən 20 Yanvar faciəsi cinayətkar imperiya rəhbərliyinin ölkəmizə qarşı xəyanətkar siyasətinə dözməyən, azadlığına, müstəqilliyinə can atan xalqımızın mübarizliyini, əyilməzliyini, məğrurluğunu bir daha nümayiş etdirdi. Nəticədə yüzlərlə həmvətənimiz şəhid olub. Faciədən artıq 34 il keçir və xalqımız hər il olduğu kimi bu il də şəhidlərimizi dərin ehtiramla yad edir. “Sumqayıt” Futbol Klubu Azərbaycan xalqının kədərinə şərik çıxır, Vətənimizin azadlığı uğrunda canlarından keçən insanların yaxınlarına səbr diləyir. Allah şəhidlərimizə rəhmət eləsin.

GÜNAY SÜLEYMANOVA