Kristian Pulişiç ötən yay “Çelsi”dən sıralarına qoşulduğu “Milan”a hər baxımdan fayda verməyi bacarır.

ABŞ yığmasının hücumameyilli yarımmüdafiəçisi A seriyasında keçirdiyi debüt mövsümündə meydana çıxdığı 18 oyunda 6 qolun və 5 məhsuldar ötürmənin müəllifi olub. 25 yaşlı futbolçu “The Athletic” qəzetinə müsahibəsində bu liqada oynamağa başlayandan sonra taktiki və müdafiəyəmeyilli oyun planında “artırdığını” deyib.

A seriyasındakı ilk təcrübəsi...
A seriyasında debüt mövsümümü keçirirəm. Bu liqada çıxış etməyi çox xoşlayıram. İtaliyada mənim üçün çox gözəl imkanlar yaradılıb.

...“Çelsi”dən yaxşı tanıdığı Jiru...
“Çelsi”dən mənə yaxşı tanış olan Jirunun “Milan”da oynaması işimə çox yaradı. Olivye yeni komandaya daha tez uyğunlaşmaqda mənə çox kömək etdi. “Milan”ın formasında “Bolonya”yaya vurduğum ilk qolun ötürməsini məhz o vermişdi. Mən onun oyun üslubuna yaxşı bələdəm. O isə mənim meydandakı hərəkətlərimi əvvəlcədən hiss edə bilir. Bir sözlə, Olivye ilə yenidən birgə oynamaq mənim üçün göydəndüşmə oldu. Bu amil komanda daxilində kollektiv bağlarını yalnız sıxlaşdırır. Mən məhz bu amilin sayəsində yeni kollektivə və çempionata daha tez uyğunlaşmağa nail olmuşam.

...həmyerlisi Musa...
O, inanılmaz uşaqdı. Milli komandada Musa ilə birgə oynamağı xoşlayırdım. İndi 21 yaşında olan Yunusu hər gün görmək və onunla birgə məşq etmək mənim üçün çox xoşdu. Nəyisə anlamayanda mənə kömək edir. O, İtaliyada mənə bir çox məqamlarda yardım edir. Əsasən də futbolla bağlı bilməli olduğum məsələlərdə onun dəstəyinə bel bağlayıram.

...sağ cinahda çıxış etməsi...
Mən İtaliyada xüsusilə sağ cinahda çıxış etməklə çox şey öyrənmişəm. İndi hücum zamanı qəfildən mərkəzə çəkilmək üçün münasib məqamı necə seçməli olduğumu yaxşı bilirəm. Həmçinin nisbətən zəif ayağımla daha yaxşı oynamağı öyrənmişəm. Xüsusilə rəqibə pressinq tətbiq edərkən lazımi qərarların qəbulu üçün əlverişli imkanı seçməyi yaxşı bacarıram. Bu baxımdan həqiqətən də, taktiki oyunumu gücləndirmişəm. Fikrimcə, müdafiəyəmeyilli oyun planında da “artırmışam”. Komandaya pressinq tətbiq edəndə və ya lazımi boşluqları dolduran zaman müdafiə olunmaqda kömək edərkən özümü yaxşı hiss edirəm. İtaliyada oynamağa başlayandan sonra futbolun bir sıra detallarında fərqli cəhətlərlə tanış oldum.

...cari mövsüm üçün hədəfləri...
Hələ mövsümün ikinci yarısı irəlidədi. Biz əvvəlki kimi, irəliyə doğru addımlamağa çalışırıq. Uğrunda mübarizə aparmalı olduğumuz hədəflərimiz var. Avrokuboklarda mübarizəni Avropa Liqasında davam etdirəcəyik. Dediyim kimi, İtaliya çempionatında mövsümün sonuna hələ çox var. Bu səbəbdən A seriyasındakı hazırkı yerimizə görə çox da bədbinliyə qapılmırıq. Ümid edirəm ki, qələbələri sıralayacaq və azarkeşlərimizi komanda ilə qürur duymağa vadar edəcəyik.

...və MLS-də mümkün çıxışı haqda
Aydındı ki, yaşlı oyunçu deyiləm. Avropada hələ bir neçə uğurlu il keçirəcəyimə ümid edirəm. İndi bu qitədə çıxış etmək xoşuma gəlir. Buna görə də MLS-də oynamaq perspektivi haqda hələ düşünmürəm. Amma karyeramın sonunda Amerikaya qayıdacağam. Mən ilk dəfə Avropada oynamağa başlayandan indiyədək uzun yol qət etmişəm. Bu yol 9 il əvvəl başlayıb. Ötən müddətdə MLS-in səviyyəsi artıb. Təkcə Lionel Messinin Mayamidə peyda olması nəyə desən dəyər. ABŞ çempionatının ildən-ilə irəli gedəcəyinə ümid edirəm.