Kərim Benzema çoxdan gözlənilən addımı atıb: o, Jerald Darmaneni məhkəməyə verib.

"Football-plus.az" xəbər verir ki, “Əl-İttihad”ın hücumçusu Fransanın daxili işlər nazirinin ona şər atdığını iddia edir. Xatırladaq ki, Darmanen 2023-cü ilin oktyabrında CNEWS telekanalının efirində fransalı futbolçunun islamçı “Müsəlman qardaşları” təşkilatının üzvü olduğunu bəyan etmişdi. Nazir bu açıqlamanı Benzemanın İsrail ordusunun bombardımanlarına məruz qalan Qəzza bölgəsinin sakinlərini dəstəkləməsindən sonra vermişdi. Dövlət məmuru son illər Benzemanın ifrat islamçı ideologiyasını dəstəkləməsini diqqətlə izlədiyini və sonda məlum qənaətə gəldiyini əsas gətirmişdi. 36 yaşlı futbolçu onda bu iddiaya dərhal mənfi reaksiya vermis, vəkili isə onun məhkəməyə müraciət edəcəyini bildirmişdi. Nəhayət, Kərim üç Aydan sonra gözlənilən addımı atıb.

Xatırladaq ki, o, “Əl-İttihad”a ötən ilin yayında “Real”dan keçib. Təcrübəli futbolçu Səudiyyə Ərəbistanı klubunda bütün turnirlərdə keçirdiyi 20 oyunda 12 qolun və 5 məhsuldar ötürmənin müəllifi olub. Yeri gəlmişkən, son günlər onun Avropaya qayıtmaq niyyətində olduğu haqda xəbərlər səngimir.