Lozannada yerləşən İdman Arbitraj Məhkəməsi (CAS) yanvarın 26-da Rusiya Olimpiya Komitəsinin (ROK) Beynəlxalq Olimpiya Komitəsində (BOK) üzvlüyünün dayandırılmasıyla bağlı apellyasiya şikayətinə baxacaq.

“Football-plus.az” xəbər verir ki, BOK rusların çox qorxduğu üzlüyün müvəqqəti dayandırılması ilə bağlı qərarı oktyabrın 12-də verib. Buna ROK-un qondarma Donetsk Xalq Respublikası və Luqansk Xalq Respublikası adlı qurumları, eləcə də də Xerson və Zaporojye vilayətlərini öz tərkibinə daxil etməsi səbəb olub. Üzvlükdən müvəqqəti uzaqlaşdırılmaq o anlama gəlir ki, ROK bundan sonra milli olimpiya komitəsi kimi fəaliyyət göstərə və olimpiya hərəkatından maliyyə yardımı ala bilməz.

Bu arada yığmamızla eyni qrupda yer alan Ukraynanın futbol üzrə gənclər yığmasının oyunçuları Fransa məmurlarına rusiyalıların Parisdə keçiriləcək Olimpiya Oyunlarına buraxılmaması tələbi ilə müraciət edib. Məktub Fransa prezidenti Emmanuel Makrona, idman naziri Ameli Udea-Kasterə, Parisin meri Ann İdalqoya və Olimpiadanın təşkilatçılarına ünvanlanıb. Məktubda xatırladılır ki, Olimpiada neytral statusla yarışmaq imkanı qazanan idmançılardan bəziləri Rusiya prezidenti Vladimir Putinin “xüsusi hərbi əməliyyat” adlandırdığı işğalçı müharibəni dəstəkləyir.

Xatırladaq ki, BOK dekabrın 8-də rusiyalı və belaruslu atletlərin neytral statusla Paris Olimpiadasına buraxılması haqda qərarını açıqlayıb. Öz idman növlərində təsnifat mərhələsində uğur qazananlar yarışlara buraxila bilər. Ancaq BOK-un tövsiyəsi komanda idman növlərinə aid olunmayacaq. BOK-un saytında yer alan informasiyaya görə, indiyə qədər Paris Olimpiadasına 6 rusiyalı və 5 belaruslu idmançı lisenziya qazanıb.