“Bəzi məşqçilər komandasının hazırlıq oyunlarının yayınlanmasını istəmir”
Peşəkar Futbol Liqası (PFL) hər fasilədə olduğu kimi, bu dəfə də “yutub” kanalında ölkə klublarının yoxlama oyunlarını canlı rejimdə təqdim etmək fikrindədi.
Sadəcə, bu dəfə durum bir qədər fərqlidi. İlk növbədə ona görə ki, klubların yarısı Türkiyəyə üz tutubsa, yarısı da vətəndə qalıb. Hətta bir neçə oyunun eyni gündə keçirilməsi də mümkündü. Bundan başqa, bəzi klublar oyunlarının yayınını müstəqil şəkildə həyata keçirmək istəyir. Məsələn, yanvarın 6-da keçirilən “Əruzurumspor”la yoxlama oyununu “Neftçi”nin telekanalı göstərdi. Bütün bu məsələlərin necə tənzimlənəcəyini öyrənmək üçün PFL-in media və marketinq direktoru Sənan Abdullayevə müraciət etdik:
“Dörd nəfərlik heyətimiz Türkiyədədi. Ordakı oyunları maksimum şəkildə işıqlandırmağa çalışacağıq. Təbii ki, bütün bunlar klublarla qarşılıqlı razılıq əsasında olur. Bəzi məşqçilər komandasının hazırlıq oyunlarının yayınlanmasını istəmir. “Neftçi”nin oyununu göstərməyəcəyik, çünki onların çəkiliş heyəti var. Oyunlarını “Neftçi” TV-də yayınlayırlar. Qalan klublardan hansısa bizə bu yöndə müraciət edirsə, qarşılamağa çalışırıq. Yəni klubların istəyi nəzərə alınır. Eyni zamanda burda, yəni Qəbələdə və Bakıda keçiriləcək matçlar da canlı yayınlanacaq. Bunun üçün heyətlər ayrılıb. Bacardığımız qədər hamısını işıqlandırmağa çalışacağıq. Oyunların üst-üstə düşməsi ilə bağlı artıq təcrübəmiz var. 1-ci və 2-ci liqada olduğu kimi, Türkiyə və Azərbaycanda da üst-üstə düşən qarşılaşmaların hamısını yayınlaya biləcəyik”.
KAMAL SƏFƏR
Digər xəbərlər
