Ayxan Abbasov Budaq Nəsirovun icarəyə verilməsinin tərəfdarıdı? - ÖZÜ AÇIQLADI
“Turan Tovuz”un futbolçusu Budaq Nəsirovun komandanın Türkiyədə keçirilən təlim-məşq toplanışından kənarda qaldığını bilirsiz. Xəbər verdiyimiz kimi, oyunçu qardaş ölkədən deportasiya edilib. Təbii ki, bu onsuz da strat heyətində möhkəmlənə bilməyən futbolçunun karyerası üçün ciddi təhlükədi. Görəsən, Budağın komandadakı rolu nədən ibarət olacaq? O, mövsümün ikinci yarısını da ehtiyat oyunçular skamyasında keçirəcəkmi?
Bu suallarla “Turan Tovuz”un baş məşqçisi Ayxan Abbasova müraciət etdik. Onun “Football-plus.az”a söylədikləri:
“Çox istəyərdik ki, Budaq Nəsirov bizimlə birgə Türkiyəyə gəlsin. Çünki illərlə futboldan uzaq olub. Ən çox onun bu məşqlərə ehtiyacı var idi. Tam hazır olmadıqca böyük futbola qayıtmaq həqiqətən çətindi. Amma Budağın özündən də çox şey asılıdı. Biz ona kömək etmək istəyirik. O, həm özünə gəlməli, həm də istəyini artırmalıdı. Biz Bakıya qayıdandan sonra komandaya qoşulacaq. “Turan Tovuz”da olmaq onun üçün böyük şansdı və inanıram ki, bundan maksimum istifadə edəcək”.
Mütəxəssis Budağın icarəyə verilməsi ehtimalına da toxundu:
“Əlbəttə, hansısa təklif olarsa və Budaq da istəyərsə, bu məsələni dəyərləndirə bilərik. Çünki onun üçün daha çox oynamaq vacibdi. Biz Budağın gələcəyini düşünüb ona qapı açdıq. Bilirsiz ki, o, heç kimin yadına düşmürdü və üç ilə yaxın idi futboldan uzaqlaşmışdı. Klub olaraq öz köməyimizi göstərmişik. Yenə deyirəm ki, çox şey məhz Budağın özündən asılıdı”.
KƏNAN BAHADIR
Digər xəbərlər
