"Komandamızın premyer-liqadakı çıxışından çox məmnunuq. Çoxları bizə autsayder gözüylə baxırdı. Amma biz göstərdik ki, ilk "4-lük" üçün oynamağa layiqik. Əslində qış fasiləsinə 3-cü yerin sahibi kimi yollanmaq istəyirdik, buna da layiq idik. Hətta son turda doğma meydanda "Səbail"i məğlub da etdik. Sadəcə, həmin turda "Neftçi" də "Kəpəz"i üstələdiyi üçün 4-cü pillə ilə kifayətləndik. Bundan da razıyıq. Hazırda fasilədi. Biz inanırıq ki, hazırkı tempi qoruyacaq, hətta bir qədər də inkişaf edərək 2-ci yarıda daha yaxşı çıxış edəcəyik. Hər bir rəqibə hörmət bəsləsək də, heç kimdən çəkinmirik. Yola saldığımız 18 oyuna fikir versəz, görərsiz ki, yaınız "Qarabağ"a qarşı zəif çıxış etmişik. Qalan matçların hər birində rəqiblərimizə yaxşıca başağrısı olduq. Hətta elə oyunlar oldu ki, 5 əsas heyət oyunçularından məhrum olmağımıza rəğmən, meydanda sona qədər döyüşərək ya qələbə qazandıq, ya da heç-heçə etdik. Bizim əsas işimiz meydanda sona kimi döyüşməkdi. Razıyam ki, bizdən üstün rəqiblər var, heyətləri müqayisə etsək, bizdən daha səviyyəli futbolçuları var. Amma məğlub da olsaq, “diş göstərməliyik”. Elə bir ev matçımız olmadı ki, azarkeşlər tribunaları doldurmasın. Bu gün əminliklə deyə bilərəm ki, bütün ev oyunlarında yalnız "Kapital Bank Arena" ağzına kimi dolur. Əsas arzularımızdan biri odu ki, 2024-cü ildə, nəhayət, Mehdi Hüseynzadə adına Sumqayıt şəhər stadionunun açılışı olsun və daha geniş stadionda komandamıza dəstək verək".