İspaniyanın “Mundo Deportivo” nəşrinin yazdığına görə, “Barselona” rəhbərliyi indiki texniki sponsor “Nike” ilə əməkdaşlıqdan narazıdı. Son vaxtlar amerikalıları əvəz etmək istəyən “Puma” Kataloniya klubuna təzyiqi artırıb.

"Football-plus.az" xəbər verir ki, Kataloniya klubundakı qaynaqlar durumu şərh etmək istəməyərək, məsələni “mürəkkəb” təyini ilə anladırlar, ancaq onlar amerikalıların almanlarla əvəzlənməsinin mümkünlüyünü istisna etmirlər.Nə olur-olsun, “Puma”nın istəyi artıq paltardəyişmə otağına da çatıb. Orda artıq 2025/26 mövsümündən etibarən başqa texniki sponsorun formalarını geyə biləcəkləri haqda söz-söhbət gəzir. İstənilən halda “blauqrana”ın oyunçuları logistik səbəbdən 2024/25 mövsümündə də “Nike” formasını daşıyacaq: artıq yaxın vaxtlarda həmin formalar hazır olmalıdı.

“Barsa”nın Amerika şirkəti ilə indiki müqaviləsinin müddəti 2028-ci ilə qədərdi. Klub bu müqavilə əsasında hər il 105 milyon, üstəlik müxtəlif bonuslar şəklində daha 50 milyon avro alır. “Nike” ilə münasibətlərin əsası uzaq 1998-ci ildə - Xosep Luis Nunyesin vaxtında qoyulub və yetərincə məhsuldar olub. Ancaq bir neçə il ərzində və müxtəlif səbəblər üzündən münasibətlər bir qədər mürəkkəbləşib və gərginləşib.

Təfərrüta tam varmasaq da, bəzi mövsümlərdə elə hallar olub ki, klubun dükanlarında əsas komandanın müxtəlif ölçülü futbolkaları çatışmayıb. 2020-ci ildə elə vəziyyət yaranıb ki, “Vapor Stadium” modelinin (hamı üçün əlçatan qiymətə olan model) satışı rəngin solması səbəbindən mümkün olmayıb.
Pandemiyadan sonra “Barsa” ilə “Nike” arasında əməkdaşlığın xarakterinə münasibətlə bağlı fikir ayrılığı var: amerikalılar ödənişi azaltmaq istəyir, klub isə başqa təkliflər də aldığından artım tərəfdarıdı. “Nike” rəhbərliyi də “Barselona”nın “Puma”dan təklif almasından xəbərdardı. Amerikalılar müqavilə vaxtından əvvəl pozulacağı təqdirdə vəziyyətin necə olacağından narahatdı.

Xatırladaq ki, “Puma” “Adidas”la “Nike”dan sonra idman geyimləri bazarında üçüncü nəhəng brenddi. Çempionlar Liqasının son qalibi “Mançester Siti” də bu şirkətin məhsullarından yararlanır, Neymarla Antuan Qrizmann şirkətin simasıdı. İspaniya klublarından “Jirona”, “Valensiya” və “Alaves” “Puma” ilə əməkdaşlıq edir. Şirkətin anlaşdığı klublar sırasında “Milan”, Dortmund “Borussiya”sı, PSV, “Marsel”, Münhenqladbax “Borussiya”sı, “Parma”, “Fənərbaxça”, “Renn”, “Lans” və “Əl-Hilal” da var.

ORXAN