2023-cü ilin futbol dünyasında hansı hadisələrlə yadda qaldığını xatırlatmağın məqamıdı.

İl milli komanda səviyyəli nəhəng turnirlər baxımından kasad olsa da, vurğulanası məqamlar da yox deyildi. Əlbəttə, 365 gün ərzində sevindirici hadisələr yaşandığı kimi, məyusluq doğuran faktlar da qeydə alındı. İndi geri boylanaraq daha önəmli hadisələrə nəzər salacağıq. Beləliklə...

...məşqçisi...
“Mançester Siti” ilə 5 titul qazanan Xosep Qvardiola “İlin ən yaxşı məşqçisi” nominasiyasında qalib gəlməyə bilməzdi. Zarafat deyil, o, artıq “şəhərlilər”in tarixinə ən titullu mütəxəssis kimi düşüb. Qvardiola məşqçi kimi Klublararası Dünya Çempionatında 4-cü dəfə qalib gəldi. İspaniyalı mütəxəssis bununla da “Real”dan olan italiyalı həmkarı Karlo Ançelottini arxada qoymaqla mütləq rekordçu oldu. Xatırladaq ki, Qvardiola 2009 və 2011-ci illərdə “Barselona”nı, 2013-cü ildə isə “Bavariya”nı bu turnirdə qələbəyə daşıyıb.