"Mənim dəyərləndirməm böyük ölçüdə bir PFL rəsmisinin yanaşması olacaq. İlk növbədə uzun illərdən sonra 2-ci liqanın yaradılmasını, əvəzedicilərin 1-ci liqadan ayrılmasını qeyd edə bilərəm. Çünki bu qərarla birdən-birə ölkədə 5 liqada mübarizə baş tutdu. Ciddi çətinliklərə baxmayaraq, xüsusilə 2-ci liqaya start verildi. Məhz bu liqa sayəsində Azərbaycanın regionlarına futbol qayıtmağa başladı. Futbolu tərk etmiş bir çox şəxs geri döndü. Ən azı futbolun ruhu qaytarıldı. Çox yaxşı xatırlayıram ki, əziyyətli bir proses oldu. İkinci məqam ölkə kubokunda PFL tarixində komanda sayına görə rekordun qırılmasıdı. İlk dəfə 34 komanda mübarizə apardı. Hətta 2-ci liqa komandalarının premyer-liqa komandası ilə qarşılaşmaları da yaşandı. Şəxsən mənim üçün bu, inanılmaz sevinc idi.

Təbii ki, bütün bunlardan da üstün hadisə “Qarabağ”ın Avropa Liqasının pley-offuna adlamasıdı. Bunda azacıq əməyi olan hər kəsə təşəkkür edirəm. Tarixi hadisədi və bunun hər anının dəyərini bilməliyik. Sonda isə şəxsən ilk növbədə bir Azərbaycan vətəndaşı, ardından PFL rəsmisi kimi Xankəndidə ölkə kubokunun 1/8 final mərhələsi çərçivəsində keçirilən “Qarabağ” – MOİK matçını ilin tarixi hadisəsi adlandırardım. Nə xoş ki, bu oyunun təşkilində bizim də rolumuz oldu. Qəza səbəbindən özümün də daxil olduğum rəhbər heyətə o oyunda iştirak qismət olmasa da, ordakı sevinc, qürur, hər birimizin idi”.