"Naxçıvanda uzun illərdi ki, böyük futbol yox idi. Hədəflərə gedən yolun uzun və keşməkeşli olacağını bilirdik. Buna baxmayaraq, var qüvvəmizi toplayaraq işə başladıq. Hələ mövsümün əvvəlindən "Araz Naxçıvan"ın bir neçə illik planı təsdiqlənib. Bu gün artıq ilk məqsədə nail olmuşuq. Düzdü, əvvəllər çox çətinliklər oldu. Heyəti qurarkən nəzərdə tutduğum futbolçuları gətirə bilmədim. Bir çoxu birinci divizionda oynamaq əvəzinə premyer-liqa klublarının ehtiyat oyunçuları siyahısında olmağı üstün tutdu. Onları da anlayışla qarşıladım. Bu işi tanınmayan, bir çox klubun önəm vermədiyi futbolçularla bacardıq. Daha böyük uğurların qarşıda bizi gözlədiyini düşünürəm".

"Premyer-liqada iştirak etmək üçün lazım olan tələblərin yerinə yetirilməsi üzərində çalışırıq. Bu yaxınlarda İcraiyyə Komitəsinin iclasında bununla bağlı müzakirələr olacaq. Ümid edirəm ki, müraciətimiz müsbət cavablandırılacaq.
Biz hazırıq. Ölkə çempionatında iştirakımıza icazə verilsə, ilk mövsümdə yerimizi möhkəmlədəcəyik. İkinci mövsümdə yuxarı pillələrdə uğur qazanmaq, üçüncü mövsümdə isə ölkə kuboku, Konfrans Liqası kimi böyük hədəflər uğrunda mübarizə aparacağıq".

"Heyətin hazırlıq səviyyəsi məni qane edir. Demək olar ki, hamısının müqavilə müddəti bu ayın sonunda bitəcək. İstərdim ki, bəziləri ilə yola davam edim. Amma bir çox dəyişikliklərin olması qaçılmazdı. Çünki premyer-liqa başqa səviyyədi. Boşluqları doldurmaq və rəqiblərlə mübarizədə fərqlənmək istəyiriksə, daha peşəkar futbolçular lazımdı.
Maliyyə cəhətdən problem yaranacağını düşünmürəm. “Cahan Holdinq”in rəhbəri və Naxçıvan Futbol Federasiyasının sədri Vüqar Abbasov bizə daimi dəstəyini ifadə edib. Bu yaxınlarda Naxçıvan Muxtar Respublikasında Prezidentin səlahiyyətli nümayəndəsi Fuad Nəcəfli ilə də qısa görüşümüz baş tutdu. Böyük futbolun Naxçıvanda inkişafı üçün həmişə kömək edə biləcəyini söylədi".