Son iki gündə futbol üzrə ölkə kubokunda 2-ci təsnifat mərhələsinin oyunları keçirilir.
Artıq 1-ci və 2-ci liqa təmsilçiləri də turnirdə yer alıb. Aşağı liqa komandaları sürpriz etməyi bacarmasalar da ən azı xarakter göstərirlər. PFL-in sözçüsü Sənan Abdullayev kubokla bağlı mataqlı status paylaşıb: "Az öncə 2-ci liqada çıxış edən “Göygöl” ölkə kuboku çərçivəsində “Turan Tovuz”la qarşılaşdı. Məncə, istər bu oyun, istərsə də darmadağınla bitən “Şəfa” - “Səbail” matçındakı nəticə ikinci dərəcəlidi. Xüsusilə Tovuzdakı oyunda yarımpeşəkar komandanın premyer-liqa təmsilçisinə qarşı mübarizəsində üzləri güldürən o qədər məqam var ki… “Göygöl”də oynayan həvəskarların belə bərabər ola biləcəkləri yeganə tərəfin əzmkarlıq olduğunu dərk etməsi, geri çəkilməməsi, qorxmaması 2-ci liqanın qazancının ilk işartısıdı. Məğlubiyyət bu gün də, sabah da var. Amma bu komandaların əksəriyyətinin oyunu artıq qələbədi".
Sənan bəy "Football-plus.az"a kubok oyunları haqda danışdı:
“Ölkə kuboku ilə bağlı şərhlərin çoxunun müsbət olması sevindiricidi. Xüsusən 2-cli liqa yaradılanda bütün çətinliklər gözə alınmışdı. PFL-in vitse-prezidenti Aslan Şahgəldiyevin püşkatma zamanı səsləndirdiyi “bir butslu futbolçu, bir əlcəkli qapıçı görsəz, təəccüblənməyin” fikri əslində çətinliklərin gözə alınmasının açıqlanması idi. Bəli, çatışmazlıqlar bu gün də var və az deyil. Ancaq nə zamansa hərəkəti vacib olan bir ağır yük yerindən tərpənib. Qarşına daş da çıxacaq, hamar yolları da olacaq.
Ölkə kubokunun bu mərhələsində bir daha göründü ki, ümidlər əbəs deyilmiş. Bəli, “Şəfa” - “Səbail” matçında aşağı liqa təmsilçisi böyük hesabla uduzdu. Amma bu özü də gözlənilən dərs idi. “Baku Sportinq”in “Kəpəz”lə oyunda yalnız əlavə hissələrdə uduzması çox xoşdu. Demirəm ki, bu komandalar bu mərhələni keçsəydi, daha çox gedəcəkdi. Bu gün reallıqla yaşamaq ən düzgünüdü. 2-ci liqa komandalarında ən xoşagələn məqamlardan biri də əksəriyyətində əməkdaşların öyrənməyə cəhd etmələridi. Yəni üzərlərində çalışmalarıdı. Ola bilməz ki, bu qədər komandanın arasından sabah, heç olmasa, bir-iki yeni baş məşqçi, menecer, idman direktoru çıxmasın. İndiyədək istər futbolçular, istərsə də bu sahədə çalışmaq arzusunda olanlar üçün belə məkan yox idi. Bu komandalarda çox fədakar insanlar var. Çox arzu edərdim ki, onlar illər sonra rayonları adına nə zamansa bu fədakarlıqlarının qarşılığını görsünlər. 2-ci liqadan “Cəbrayıl”ın futbolçusunun U-19-a, “Karvan”ın oyunçusunun U-21-ə dəvət alması da önəmli məqamdı. Azərbaycan kuboku isə istər bu, eləcə də karyerasını bitirmiş və artıq geri dönməyə başlamış şəxslər üçün ən azı zövq, özünütəsdiq yeridi. Çünki yenidən diqqət mərkəzində olurlar, “CBC Sport” vasitəsilə ölkənin bir çox nöqtəsindən oyunları izləyən tamaşaçıların qarşısında öz bölgələrini təmsil edirlər. Barələrində xəbərlər yazılır, süjetlər hazırlanır. Bir sözlə, bütün çətinliklərə, çatışmazlıqlara rəğmən, bu gün əsl Azərbaycan kubokunu izləyirik”.
ABDULLA İSMAYILOĞLU