"Düzünə qalsa, "Neftçi" camiəsində nələrin baş verdiyi böyük bir sürprizdi. Komandada müqavilər necə tənzimlənir, nəyə əsasən imzalanır - bilmirəm. Ümumiyyətlə, Adrian Mutunun flaqmanın “sükanı arxasına” gətirilməsinin səbəbi nə idi? Mutu ulduz futbolçudu, Rumıniyanın canlı əfsanəsi, brendi olsa da, baş məşqçi kimi onun heç bir uğuru yoxdu. Çoxları deyə bilər ki, Rumıniyanın gənclər miillisiylə uğurları olub. Əslində bu onun baş məşqçiliyinə yox, heyətdə potensiallı gənclərin olmasına görə idi. Mutu ancaq "Dinamo"da klub meneceri kimi özünü yaxşı tərəfdən göstərə bildi. Ona görə bir daha sual edirəm ki, məşqçi dosyesində uğurları olmayan biri "Neftçi"yə nə qazandıra bilərdi? Gətirdiyi futbolçulara da nəzər yetirək. Mark Tamaş Rumıniya çempionatında etdiyi səhvləri bizim premyer-liqada da etdi. Yuri Matias daim CFR-də ehtiyatda qalırdı. Adrian Mutunun flaqmana ancaq logistika, təbliğat, reklam sahəsində xeyir verdiyini düşünürəm. Çünki ulduz futbolçuya görə "Neftçi"yə bir qədər də maraq artdı. Rumıniyanın aparıcı qəzet-saytlarında "ağ-qaralar" barədə yazılar, xəbərlər yer aldı. Amma Mutunun başqa faydası olmadı. Hesab edirəm ki, Laurentsiu Regekampfın "Neftçi"dən göndərilməsi və yerinə ulduz futbolçunun gətirilməsi düzgün deyildi. Ən azı birincinin baş məşqçi kimi uğuru vardı. Ümumilikdə Azərbaycana gəlib-getmiş rumıniyalı mütəxəssislərdən ancaq Mirça Redniki xüsusi vurğulayardım. O, az-çox futbolumuza rəng qata bilmişdi. Bilmirəm ki, "Neftçi" rəhbərliyi niyə yerli məşqçilərə şans vermir? Görünür, azərbaycanlı məşqçilərə güvənmirlər. Mutunun yerinə gətirilən baş məşqçinin nə dərəcədə komandaya fayda verəcəyini deyə bilmərəm. Dediyinə görə, komandada çıxış edən bir neçə futbolçunu tanıyır. Bu onun üstüyünlüyüdü. İstənilən halda "Neftçi"də qəribə islahat, təyinatlar gedir. Görək axırı necə olacaq..."