“Ən azı 2-3 legioner almağı planlaşdırırıq” – Lider daha da güclənir
Futzal üzrə yüksək liqa iştirakçısı “Araz-Naxçıvan”ın heyətində dəyişiklik baş verib.
Belə ki, lider legioneri Erik Danniloyla yollarını ayırıb.
Maraqlıdı ki, futzalçının göstəriciləri yaxşıdı. O, ölkə çempionatında 6, Çempionlar Liqasının ilkin mərhələsində 2 qolla yadda qalıb. Bəs, vidanın səbəbi nədi? Dannilo öz istəyiylə getdi? Yoxsa, klubla oyunçu arasında anlaşmazlıq var?
Bu suallarla “Araz-Naxçıvan”ın vitse-prezidenti Mahmud Sadıqova müraciət etdik. Onun “football-plus.az”a söylədikləri:
“Eriklə beş aylıq müqavilə bağlamışdıq. Müqavilənin vaxtı bitdi. Əvvəldən razılaşmışdıq ki, özünü doğruldub, komandaya lazımlı olsa, müqavilənin müddətini mayın 31-nə qədər uzadacıq. Gözləntiləri qarşılamadığı halda isə yola salınacaq. Özü də şərtlərlə razılaşmışdı. Nəticə gözlədiyimiz kimi olmadığı üçün yollarımızı ayırdıq. Heç bir problem yox idi”.
Klub rəsmisi gələcək planlar haqda fikirlərini də bizimlə bölüşdü:
“Hazırda daha yaxşı nəticələr göstərəcək futzalçılar axtarırıq. Komandada yeni qan olmalıdı. Bir neçə oyunçu ilə danışıqlar aparırıq. Ən azı 2-3 legioner almağı planlaşdırırıq. Proseslər uzun çəksə də yanvarın 10-a qədər yekunlaşacaq”.
GÜNAY SÜLEYMANOVA
Digər xəbərlər
