"Səfərə yaxşı nəticə üçün gəlmişdik. Uzun məsafə qət etdiyimizdən yorğunduq, üstəlik sərəncamımda cəmi 16 oyunçu var idi. Amma oyuna yaxşı qoşulduq. İlk hissədə dominant futbol sərgiləyib hesabı açdıq, fasilədən sonra isə 2-ci qolu vurduq. Bundan sonra bir qədər arxayınlıq yarandı. Rəqibin də itiriləsi heç nəyi olmadığından hücuma atıldı. 68-ci dəqiqədə əsas qol silahımız Cəlal Cəbrayılovun zədələnərək əvəzlənməsi də vəziyyətimizi ağırlaşdırdı. Bundan istifadə edən rəqib təzyiqi artırdı və qapımızda 2 qol gördük. Oyunun sərt mübarizə şəraitində keçməsi hər iki komandanın futbolçularının sarı vərəqələr almasıyla nəticələndi. "Turan Tovuz-2"nin təzyiqlərinə dözsək də, uzatma dəqiqəsində hakim qapımıza penalti təyin etdi və nəticədə qapımızda 3-cü qolu gördük. Fikrimcə, həmin epizodda qayda pozuntusu yox idi. Çünki top futbolçumuzun başından çiyninə təmas etdi, amma hakim fərqli qərar qəbul verdi. Oyun gərgin keçdiyindən köməkçim Nəsib Əliyev də emosiyalarını cilovlaya bilmirdi və sarı vərəqə aldı. Penalti epizodunda isə referiyə etiraza görə 2-ci “sarı”nı gördü. Bu oyundan nəticə çıxarmalı və qarşıdakı iki tura ciddi hazırlaşmaqla 3-cü yeri heç kimə güzəştə getməməliyik".