“Zirə” cari mövsümə uğurlu başladı. Xatırlayıram ki, baş məşqçi Rəşad Sadıqov yay fasiləsində kollektivi müəyyən qədər formalaşdırdı. Ötən “futbol ili”nə nisbətən indi komanda daha baxımlı futbol oynayır və daha çox hücum qurmağa çalışır. Ötənilki “beşli” müdafiə sistemindən fərqli artıq “dördlü”yə keçiblər. Dəst-xəttin dəyişməsində İsmayıl İbrahimlinin xüsusi rolu var. Futbolçunun mövqeyi mərkəz yarımmüdafiəçisi olsa da, bəzi hallarda müdafiənin cinahına açılır və burda say çoxluğu yarada bilir. Ümumiyyətlə, ötən mövsüm də müxtəlif mövqelərdə yaxşı çıxış edən oyunçular var idi. Deməzdim ki, “qartallar” uğursuz çıxış edir”.

“Rəşad Sadıqovun yetirmələri məğlub olduqları oyunlarda qalib gələ bilərdi. Hətta 15-ci turda “Neftçi”ylə görüşdə daha yaxşı çıxış etdilər. Sadəcə, qol imkanlarından istifadə olunmadı. İssa Cibrillanın səhvinə görə rəqib hesabı açdı. Cari mövsümdə premyer-liqanın gərgin mübarizə şəraitində keçdiyini nəzərə alsaq, bəzi komandaların enişdə olması normaldı. İki eyni güclü heyətə malik kollektivlər bu mərhələni tez adlayır. Lakin “Zirə”də belə deyil. Deməli, eniş dövrü uzun çəkə bilər. Qəsəbə təmsilçisinin bəxti onda gətirib ki, klublar qış fasiləsinə yollanır”.

“Zirə” yaxşı mənada sözünü deyib və “Neftçi”, “Sabah” kimi rəqibləri geridə qoyub. Bu, böyük uğurdu. İnanıram ki, Rəşad Sadıqov və kollektivi bütün problemləri aradan qaldıracaq. “Qartallar”ın çempion olacağını demək reallıqdan uzaqdı. Çünki “Qarabağ”ın gücünə və necə yüksək intensivli oyunlardan keçdiyinə bələdik. “Köhlən atlar” mövsüm başlayanda formasını tam bərpa etməmişdi. Ağdam təmsilçisi işə düşəndə qarşısıalınmaz mexanizmə sahibdi. Səmimi deyim ki, “Zirə” ikinci yerdə möhkəmlənsə, daha yaxşı olar. Bu komandanın liderliyinin müvəqqəti olduğunu hər kəs bilirdi. Onsuz da bir neçə tur sonra “Qarabağ”, ümumiyyətlə, əlçatmaz olacaq. Premyer-liqada Qurban Qurbanovun yetirmələrinin təzyiqinə kiminsə tab gətirəcəyinə inanmıram. Azarkeşləri 2-ci pillədə ola bildiyinə görə “Zirə”yə “çox sağ ol” deməlidi. Komanda isə yerini qorumaq üçün döyüşməlidi”.

“Etiraf edək ki, “qartallar”ın hücum xəttində problem var. “Transfer pəncərəsi”ndə həll edilməli çatışmazlıq məhz budu. Rəşad Sadıqovun müəyyən futbolçulara şans verib qol vurmasına şərait yaratdığını görürük. Lakin rəqiblər də bu yöndəki boşluqları müxtəlif təhlillərlə aradan qaldırır. “Zirə”nin baş məşqçisinin premyer-liqa təcrübəsi var və çempionatın nəbzini tutub. Bəllidi ki, komandaya keyfiyyətli hücumçu lazımdı. Elə futbolçu alınmalıdı ki, heç nədən qol vura bilsin. Komanda bu addımı atsa, xeyrini mütləq görəcək. Qış faisiləsində belə oyunçuların sayının az, qiymətinin baha olduğunu bilirəm. Üstəlik əksəriyyətinin klubuyla müqavilə müddəti davam edir. Yenə də tapmaq olar”.