“Braqa”nın büdcəsi bizdən çox böyükdü”
Azərbaycan kubokunun 1/8 finalında “Qarabağ” MOİK-i məğlub edib - 1:0.
“Football-plus.az” xəbər verir ki, matçdan sonra ağdamlıların prezidenti Tahir Gözəl jurnalistlərin suallarını cavablandırıb:
"MOİK möhtəşəm çıxış etdi. Onları alqışlamaq lazımdı. Əsgərlərin qələbə ruhunu futbolçularında gördük. Onlarla qürur duydum. “Qarabağ” prezidenti kimi deyirəm, MOİK qalib gəlsəydi, inanın üzülməyəcəkdim. Yenə də, halal olsun deyəcəkdim. Çünki alınlarının təri ilə böyük mübarizə apardılar. Sadəcə, qismət bizə imiş. Hər komanda qalib gəlmək istəyirdi".
- Bura dünəndən gəlmisiz. Şuşa və Xankəndidə də olmusuz. Şəhərlərimizlə bağlı təəssüratınız necədi?
- Bura ilk dəfədir gəlirəm. Dahah əvvəl klubla Ağdama getmişdim. Buraları gecəm piyada gəzmişəm. Çox qeyri-adi duyğudu. Allah qoysa, gələcək nəsillər bu mənəviyyatı, gözəlliyi öz ürəklərində daşısınlar. Buraları geri qaytarmaq, buralara gəlmək... Böyük fədakarlığın nəticəsində buralara gəlib çatmışıq. Ona görə böyük qürur, sevinc hissi var. Çox gözəl yerlərdi. Bütün Qarabağı tək-tək ziyarət etmək istəyirəm.
- Avropa klublarını burda qonaq etməyi düşünürsüz?
- Cənab prezident matçdan əvvəl, “İmarət”in tezliklə inşa ediləcəyi haqda xoş xəbər verdi. Allah qoysa, Avropa komandalarını orada qəbul edəcəyik. Avropa klublarına mesajım budu ki: ən böyük klublar illərdir avrokuboklarda oynayırlar, amma son illərin ən gözəl sürprizi “Qarabağ”dı. Azərbaycan futbolunda tarix yazıb. Onların heç gözləmədiyi cəsarətdə, imanda klub qarşılarına çıxır. Biz Avropada həmişə sürpriz edəcəyik.
- “Qarabağ” yenidən Xankəndinə səfər edə bilər?
- AFFA ilə bərabər bura gəlməyə həmişə hazırıq. “Qarabağ” infrastrukturu və hər şeyi ilə artıq Bakıda yerləşən klubdu. Amma “İmarət” stadionu tikiləndə, şərait normal olanda, əbləttə ki, ən gözəl oyunlarımızı, ilin ən baxımlı, maraqlı matçlarını burada keçirməkdən şərəf duyarıq.
- Avropa Liqasında “Braqa” ilə qarşılaşacaqsınız. Bu haqda fikriniz necədi?
- Potensial rəqiblər arasında Çempionlar Liqasında çempion olmağı qarşısına hədəf qoymuş “Milan” kimi klublar var idi. Hesab edirəm ki, “Braqa”ya qarşı oyunlarımız ağır olacaq. Amma bizim qarşımıza çıxmasını arzu etdiyimiz üç klubdan biri onlar idi. Portuqaliyanın möhtəşəm mədəniyyəti, tarixi var. Qarşımızda hörmətli, dərin klub dayanıb. Bir şeyi də unutmayaq ki, “Braqa”nın büdcəsi bizdən çox böyükdü. Amma “Qarabağ” “Bayer”ə qarşı göstərdiyi mübarizəni orada göstərsə, məncə, çox böyük şansımız var.
Digər xəbərlər
