Misli premyer-liqasında 17-ci tura Tofiq Bəhramov adına Respublika stadionunda yekun vurulurdu.

Azarkeşlər arenada bayram ab-havası yaratmışdı. Çünki "Qarabağ" burda əzəli rəqibi "Neftçi"ni sınağa çəkirdi. Matçın derbi xarakterli olması da öz yerində. Əlbəttə, "Qarabağ"ın lider kürsüsündəki yeri rahatdı. "Köhlən atlar" ən yaxın izləyicisi "Zirə"ni 6 xalla qabaqlayırdı. "Neftçi" isə iddialı rəqiblərinin qələbə qazanmasından sonra turnir cədvəlində 2 pillə geriləyib 5-ci sırada qərarlaşmışdı. Sadə dildə desək, çempionluq məqsədiylə yola çıxan "ağ-qaralar" üçün 1 xal belə can dərmanı idi, nəinki qələbə...

Nəhayət, Rəvan Həmzəzadənin start fiti səsləndi və qızğın mübarizə başlandı. İlk təhlükəli vəziyyəti bakılılar yaratsa da, Melano Ozobiçin ötürməsindən faydalana bilmədi. İrəliləyən dəqiqələrdə "Qarabağ" üstünlüyü ələ alıb, rəqibi təzyiq altında saxlamağa başladı. Bunu meydandakı mənzərəyə əsasən demək mümkündü. Çünki Ağdam təmsilçisi rəqibi meydanın özünə aid hissəsinə sıxışdırmışdı. "Köhlən atlar" cəld ötürmələrlə "Neftçi"nin başını gicəlləndirir, fürsət düşən kimi qapıya zərbə endirirdi. Bu ərəfədə Zubir, Patrik, Benzya və Leandro dəfələrlə bəxtini sınasa da, Rza yerində idi. Gah qoliper irəli atılıb hesabın açılmasına mane oldu, gah da meydan sahibləri qapını dəqiq nişan almadı. Ümumiyyətlə, Mutunun komandası 1-ci hissədə, sadəcə, müdafiə olunmaqla məşğul idi.

İkinci yarı daha baxımlı oldu. Həm “Qarabağ”ın, həm də “Neftçi”nin qarşılıqlı hücumlarını izlədik. Öncə Benzya ardıcıl iki dəfə, sonra Koffi fürsəti əldən verdi. 66-cı dəqiqədə top ilk dəfə tora qovuşdu. Daha dəqiq desək, Elvinin qapı önünə ötürməsi Azər Salahlıya toxunub “çərçivə”yə daxil oldu. Amma VAR-ın yoxlamasından sonra avtoqol qeydə alınmadı. Çünki Elvin ofsaydda idi. Hesab 71-ci dəqiqədə açıldı. Belə ki, rəqib müdafiəçilər arasından məharətlə sıyrılan Juninyo xəsislik etmədən topu nəzarətsiz qalan Benzyaya ötürdü. Rza fransalı yarımmüdafiəçinin zərbəsini dəf etmək üçün irəli atılsa da, işə yaramadı. “Neftçi” ikinci hissədə yalnız bir dəfə qola yaxın oldu ki, onda da Valdesin baş zərbəsi dəqiq olmadı. Matçda son nöqtə isə 90+2-ci dəqiqədə qoyuldu. Rza öncə Patrikin uzaqdan zərbəsini dəf etsə də, topa sahiblənə bilmədi. Nəticədə önə çıxan Keyta bəxtini sınadı. “Ağ-qaralar”ın qapıçısı yenə eyni səhvə yol verdiyindən geri qaytardığı topu qapı torunun içində gördü. Beləliklə, “Qarabağ” qələbə seriyasını 6-ya çatdırdı. “Neftçi” isə ardıcıl 10-cu Azərbaycan derbisindən məğlub ayrıldı.

Gözdən qaçmadı
* "Azərreyl"in rumıniyalı voleybolçusu Anamariya Berdila və türkiyəlisi İlkay Dəmir "Neftçi"ni, millimizin və İsveç "Yurqorden"in hücumçusu Musa Qurbanlı "Qarabağ"ı dəstəkləmək üçün stadiona gəlmişdi.
* "Qarabağ Ordu" "bu şəhər bizimdi" şüarıyla "Forza Neftçi"yə söz atdı. “Neftçi” azarkeşləri komandanın məğlubiyyəti rəsmiləşdikdən sonra baş məşqçi Adrian Mutunu istefaya səslədi.

KƏNAN BAHADIR