MBA-da son iki gündə keçirilən oyunlarda bəzi rekordlar yeniləndi.

“Football-plus.az” xəbər verir ki, ilk növbədə “Detroyt”un məğlubiyyət seriyasına toxunmağa dəyər. “Pistons” bu dəfə evdə “Filadelfiya 76” ilə bacarmadı – 111:129. Bununla da komandanın ardıcıl məğlubiyyətlərinin sayı 21-ə çatdı. Bu isə klub antirekordunun təkrarlanması deməkdi. “San-Antonio” da “doğma divarlar” arasında “Leykers”lə bacarmadı – 119:122. Ardıcıl məğlubiyyət sayını 18-ə çatdıran “Spers” klub antirekordunu yenilədi.
“İndiana”ya 140:126 hesabıyla qalib gəldikləri oyunda “Miluoki”nin iki oyunçusu seçildi. Oyun qurucusu Demien Lillard MHL tarixində reallaşan üçxallıq atışların sayına görə 5-ci pilləyə yüksəldi. 33 yaşlı amerikalı bu oyunda karyerasında 2451-ci belə atışı reallaşdırmaqla Kayl Korvarı (2450) arxada qoydu. Üçxallıq atışların sayına görə MBA rekordu Stefen Karriyə (3496) məxsusdu. Bu göstəricidə 2-ci yerdə Rey Allen (2973), 3-cü yerdə Ceyms Harden (2795), 4-cü yerdə isə Reci Miller (2560) qərarlaşıb.
“Miluoki” – “İndiana” oyununda “Baks”ın lideri Yannis Adetokunbo hamıdan yüksək məhsuldarlıq göstərdi. 64 xal toplayan yunan forvard iki göstəricidə şəxsi rekord müəyyənləşdirdi: xal və reallaşdırılan cərimə atışlarının (32-dən 24) sayında. Yannis həmçinin xal sayında klub rekordunu da yenilədi. Bu oyuna qədər “Miluoki”nin rekordçusu Maykl Redd idi. O, 2006-cı il noyabrın 11-də “Yuta” ilə oyunda (111:113) 57 xal toplamışdı.

Yeri gəlmişkən, oyundan sonra çox maraqlı hadisə baş verdi. “İndiana”nın oyunçuları Adetokunbonun 64 xal topladığı topu meydandan apardılar. Adətən, rekord müəyyənləşdirən basketbolçu topu özünə götürür. Ancaq “İndiana”nın oyunçuları bu ənənəni pozaraq topu öz paltardəyişmə otaqlarına apardılar. Qəzəbli Adetokunbo onların arxasınca yollananda isə dava düşdü.

14 dekabr
Vaşinqton – Nyu-Orlean 122:142 (30:28, 34:47, 29:35, 29:32)
Detroyt – Filadelfiya 76 111:129 (26:39, 30:31, 24:34, 31:25)
Mayami – Şarlott 115:104 (22:23, 34:22, 35:25, 24:34)
Toronto – Atlanta 135:128 (31:39, 33:27, 39:29, 32:33)
San-Antonio – Leykers 119:122 (26:34, 24:29, 24:29, 45:30)
Hyuston – Memfis 117:104 (29:23, 28:20, 25:38, 35:23)
Miluoki – İndiana 140:126 (36:33, 34:30, 31:31, 39:32)
Finiks Bruklin 112:116 (22:31, 34:33, 32:22, 24:30)
Yuta Nyu-York 117:113 (22:31, 30:19, 37:34, 28:29)
15 dekabr
Boston Klivlend 116:107 (33:24, 32:30, 25:33, 26:20)
Mayami Çikaqo 116:124 (22:36, 34:24, 32:33, 28:31)
Dallas Minnesota 101:119 (30:26, 30:33, 22:28, 19:32)
Denver Bruklin 124:101 (29:22, 23:17, 38:28, 34:34)
Portlend Yuta 114:122 (30:38, 24:31, 22:34, 38:19)
Sakramento Oklahoma-Siti 128:123 (29:30, 30:23, 41:39, 28:31)
Klippers Qolden Steyt 121:113 (29:28, 40:28, 30:37, 22:20)