“Qarabağ” bu gün Avropa Liqasında qrup mərhələsinin son oyununa çıxır.

Nəfəslər dayanıb, bilet tükənib, hər kəs Azərbaycan çempionunun pley-offa qələbə ilə adlamasının intizarındadı. Düzdü, hadisələr elə cərəyan edə bilər ki, məğlubiyyət də ağdamlılara mane olmaz. Amma bu ilə məhz qələbə ilə yekun vurmaq “Qarabağ”a da, futbolumuza da, Azərbaycana da çox lazımdı.

1-ci səbəb: sosial sifariş, tarixə düşmək şansı
“Qarabağ” ardıcıl 10 ildi avrokubokların qrupunda oynayır və əvvəlki 9 ilin heç birində nəinki qitənin əsas klub turniri olan Çempionlar Liqasında, heç 2-ci dərəcəli turnir sayılan Avropa Liqasında da pley-offa adlamayıb. Bu mənada tarix yazmaq ağdamlıların öz əlindədi. Həm də bu, bütün ölkənin istədiyi, arzuladığı, təşnə olduğu qələbədi. Xankəndində bayrağımızın dalğalandığı ilə Qarabağın bizimki olmasının rəmzinə çevrilən komandanın gözəl bir hədiyyə ilə yekun vurmasına ehtiyacımız var.

2-ci səbəb: Rusiyanı geridə qoymaq imkanı
Tam 35 il ərzində Xankəndinə, Qarabağa həsrət qalmağımızın əsas səbəbkarından olan Rusiya hazırda 18,632 xalla UEFA-nın əmsallar cədvəlində 28-ci yerdə qərarlaşıb. Məlum səbəbdən Rusiyanın klubları ardıcıl iki ildi avrokuboklara qatılmır. UEFA ötən il Rusiya futboluna 4,333 bal bağışlamışdısa, bu il hədiyyəni kəsdi. Bu üzdən Rusiyanın əmsallar cədvəlində tədricən aşağı yuvarlanması anlaşılandı. Slovakiya və Bolqarıstan cari mövsümdə artıq şimal qonşularımızı arxada qoyub. İndi isə növbə bizimdi. 28-ci pillədə olan ölkəmizin əmsalı 18,125-ə bərabərdi. “Qarabağ” bu gün “Həkken”ə qalib gəlsə, 2 xal qazanacaq, bunu da təmsilçi sayımıza, yəni 4-ə böləndə 0,500 bal edir. Deməli, reytinqimiz avtomatik 18,625-ə yüksələcək. Düzdü, bu halda da ruslardan azacıq geri qalırıq. Ancaq...
İsveç klubu üzərindəki mümkün qələbə “Qarabağ”ı qrup ikincisi edəcək, Avropa Liqasının qrupunda ikincilik bizə 2 bonus xalı da qazandıracaq. Deməli, daha 0,500, toplam 19,125 əmsal və ...əlvida, Rusiya! Belədə avtomatik Rusiyanı arxada qoyub 28-ci pilləyə yüksəlirik. Yeri gəlmişkən, bu hədəfə çatmaq üçün “Qarabağ”ın “Həkken”lə heç-heçəsi də bəs edə bilər. Ancaq bu məqamda “Molde”nin paralel oyunda “Bayer-04”ü məğlub etməməsi lazım gələcək. Axı belədə “Qarabağ” 3-cü yerin sahibi kimi Konfrans Liqasına yollanacaq və bonus da qazanmayacaq.

3-cü səbəb: mövsümlük əmsal rekordunu yeniləmək
Qələbə təkcə Rusiyanı arxada qoymağımıza imkan verməyəcək, həm də Azərbaycanın yeni mövsümlük rekord müəyyənləşdirməsinə yol açacaq. Avrokuboklarda çıxış etdiyimiz illər ərzində mövsümlük qazancımız maksimum 4,375 bal olub. Üç dəfə - 2015/16, 2017/18, 2021/22 mövsümlərində bu rəqəmdə dayanmışıq. Bu mövsüm üçün artıq 3,875 əmsal toplamışıq. “Qarabağ” bu gün qələbə qazacanağı halda mövsümlük əmsalımız avtomatik 4,875-ə yüksələcək ki, bu da yeni ölkə rekordu deməkdi.

4-cü səbəb: son tur sindromuna son
Girişdə vurğuladığımız kimi, “Qarabağ” indiyə qədər 9 dəfə avrokubokların qrupunda oynayıb. Maraqlıdı ki, ağdamlılar heç vaxt sonuncu – 6-cı turda qələbə qazana bilməyib. Əvvəlcə illər üzrə nəticələrə nəzər salaq.
11.12.2014. AL. Qarabağ – İnter (İtaliya) 0:0
10.12.2015. AL. Anderlext (Belçika) – Qarabağ 2:1
08.12.2016. AL. Qarabağ – Fiorentina (İtaliya) 1:2
05.12.2017. ÇL. Roma (İtaliya) – Qarabağ 1:0
13.12.2018. AL. Arsenal (İngiltərə) – Qarabağ 1:0
12.12.2019. AL. Qarabağ – Düdelanj (Lüksemburq) 1:1
10.12.2020. AL. Vilyarreal (İspaniya) – Qarabağ +:-
09.12.2021. KL. Bazel (İsveçrə) – Qarabağ 3:0
03.11.2022. AL. Qarabağ – Frayburq (Almaniya) 1:1
Statistikadan da göründüyü kimi, “Qarabağ” heç vaxt avrokubok ilinə qələbə ilə yekun vurmayıb. Tilsimi məhz bu il qırmaq olar.

5-ci səbəb: “Molde”dən güclü olduğumuzu göstərmək imkanı
Bu mülahizə bəlkə də çoxlarına qəribə görünəcək. Axı Norveç klubunu evdə məğlub etmişik, səfərdən də heç-heçə ilə dönmüşük. Amma qrupun turnir cədvəlində xallar bərabərdi, hətta top fərqində norveçlilər öndədi. Odu ki, qrupun son oyununda qələbə qazanıb “Molde” ilə xal fərqi yaratmaq, bu komandanı “Bayer-04”lə baş-başa buraxmaq lazımdı.

ORXAN