Bu həftə avrokuboklarda Türkiyə futbolu üçün çox uğursuz alındı.

"Football-plus.az" xəbər verir ki, qardaş ölkənin hər üç təmsilçisi həftəni məğlubiyyətlə tamamladı!

Çempionlar Liqasında ''Qalatasaray'' ''Bavariya''ya səfərdə yenildisə, Konfrans Liqasında ''Beşiktaş'' evdə ''Bude/Qlimt''ə, ''Fənərbaxça'' isə səfərdə ''Ludoqorets''ə boyun əydi. Düzdü, 4 tura 4 xalı olan ''Cim-Bom''un pley-offa yüksəlmək şansı hələ də öz əlindədi. ''Fənər'' isə Bolqarıstandakı məğlubiyyətə baxmayaraq 9 xalla qrupunda liderdi. Amma İstanbulun digər nəhəngi ''Beşiktaş'' üçün qrup mərhələsi ilə birlikdə avrokubok mövsümü başa çatacaq.

Belə ki, 4 turdan sonra aktivində cəmi 1 xal olan ''Qartal''ın pley-off şansı qalmadı. Fanatların oyunun gedişində müvəqqəti məşqçi Burak Yılmaz ilə rəhbərliyin əleyhinə, eləcə də kluba sonuncu çempionluğu yaşadan Sərgən Yalçının lehinə şüarlar səsləndirməsi diqqət çəkdi. Çox çətin bir dönəmdən keçən ''ağ-qaralar''da dekabrın 3-də prezident seçkilərinin olacağını xatırladaq. Onu da bildirək ki, ''Beşiktaş'' avrokubokların qrup mərhələsində öz meydanında ardıcıl 5-ci (son 10 oyunda 9-cu) dəfə uduzmaqla öz antirekordunu yenilədi!

ƏLİ