Xəbər verdiyimiz kimi, ölkəmizin kişilərdən ibarət basketbol yığması Tahir Baxşıyevə tapşırılıb.

"Football-plus.az" olaraq, təcrübəli mütəxəssislə əlaqə saxlayaraq təyinatı və başqa məsələlər ətrafında söhbət etdik.

- “NTD-İndiqo” ilə milli komandanı paralel şəkildə çalışdırmaq sizin üçün çətin olmayacaq ki?
- Deməzdim ki, çətin olacaq. Çünki yığmanın oyunçularının çoxu çempionatda iştirak edir. Hər şey göz qabağındadı. Onlara yarışlarda baxmaq mənə daha da rahat olacaq. Bir çoxu ilə oynamışam. Komandanın 40 faizi mənim yetirmələrimdi. Fikrimcə, heç bir çətinlik olmayacaq.

- Məşqçilər korpusunda ispaniyalı Alberto Blanko da olacaq. Onunla əvvəldən şəxsi tanışlığınız var idi, yoxsa ispaniyalının namizədliyini federasiya irəli sürdü?
- Xeyr, heç bir tanışlığım olmayıb. Bildiyiniz kimi, A qrupunda İsveçrə, Kosova və İrlandiya ilə qarşılaşacıq. Federasiya ilə birlikdə düşündük ki, bu Avropa komandalarını daha yaxından tanıyan məşqçi lazımdı. O, oyunçulardan, komandanın özündən daha çox məlumat yığacaq. Blankoyla bir yerdə hər şeyə baxacağıq. 4-5 təklif var idi. Mən seçimimi ispan mütəxəssisdə saxladım. Belə qərara gəldik ki, Alberto Blanko bizə kömək edəcək.

- Fevralın 22-də dünya çempionatının ilkin təsnifat mərhələsi çərçivəsində İsveçrə ilə qarşılaşacaqsız. Yığma bu oyuna ölkə daxilində, yoxsa xaricdə hazırlaşacaq? Yəni toplanış harda olacaq?
- Bəli, bu məsələ haqda danışmışıq. Toplanış Türkiyədə keçiriləcək. Oyundan bir həftə əvvəl ora gedəcəyik.

- Basketbol üzrə ölkə çempionatında legionerlərin “at oynatdığını” nəzərə alsaq, yığmada keyfiyyət dəyişikliyinə necə nail olacaqsız? Yoxsa siz də “milliləşdirilən” oyunçuların köməyinə ehtiyac duyacaqsız?
- Deməzdim ki, bizim çempionatda oyunlar legionerlərin hesabına udulur. Həmyerlilərimizin də qələbələrdə rolu böyükdü. “Milliləşdirməyə” gəlincə, bir əcnəbi oyunçu ola bilər. 11 azərbaycanlı olmalıdı. Bu məsələni də məşqçilər korpusu ilə bərabər fikirləşirik. Lazım olsa, bir əcnəbi basketbolçu “milliləşdirmək” istəyirik.

GÜNAY SÜLEYMANOVA