Tahir Baxşıyev ermənilər üzərində qələbədən danışdı
Kosovonun paytaxtı Priştinada basketbol üzrə Avropa çempionatının C divizionunun oyunları keçirilir. B qrupunda mübarizə aparan U-16 millimiz ikinci matçında Ermənistana qalib gəlib - 92:58
Komandanın çıxışı barədə baş məşqçi Tahir Baxşıyevlə söhbətləşdik. O, "Football-plus.az"a açıqlamasında bunları dedi:
"Qrupun ilk oyununda Cənubi Kiprə məğlub olduq. Bunun səbəbi komandada həyəcanın olması idi. Bir ildi ki, Polad Həsənovla birlikdə bu kollektivlə işləyirik. Amma bu vaxt ərzində ilk dəfə yığmanın belə zəif oyununu izlədim. Matçdan sonra səhvlərimizə baxdıq və Ermənistanla oyuna daha yaxşı hazırlaşıb qələbə qazandıq. Növbəti oyunlarımız Albaniya və San Marinoya qarşı olacaq. Məqsədimiz çempion olmaqdı".
Baxşıyev ölkə basketbolunun vəziyyəti barədə də fikirlərini bildirdi:
"Federasiya tərəfindən ölkə basketbolunun inkişafına dəstək var. Biz bunu son keçirilən ölkə çempionatında gördük. Rəhbərlik lazımi şəraiti yaradıb. İndi birlikdə olub, yaxşı işləməliyik".
CAVİD ƏLİYEV
Digər xəbərlər
