İngiltərə premyer-liqasında noyabrın ən yaxşı oyunçusu ilə məşqçisi müəyyənləşib.

“Football-plus.az” xəbər verir ki, hər iki nominasiyanın qalibi eyni klubun üzvləri olub. Ən yaxşı oyunçu nominasiyasında “Mançester Yunayted”in müdafiəçisi Harri Maquayr qalib gəlib. İngilis futbolçu səsvermədə Rahim Sterlinq (Çelsi), Ceremi Dokyu (Mançester Siti), Entoni Qordon (Nyukasl), Tomas Kaminski (Luton) və Markus Tavernyeni (Bornmut) qabaqlayıb.

Maquayr noyabrda üç oyunda meydana çıxıb. Onun komandası həmin matçarda top buraxmadan qalib gəlib. Harri bu mövsüm MY-nin heyətində bütün turnirlərdə 14 oyuna çıxıb, 1 qol vurub və 1 məhsuldar ötürmə verib.

Premyer-liqada noyabrın ən yaxşı məşqçisi adına isə Erik ten Haq layiq görülüb. Niderlandlı mütəxəssis azarkeşlər arasında keçirilən səsvermədə bütün həmkarlarını qabaqlayıb. Xatırladaq ki, onun çalışdırdığı “Mançester Yunayted” ötən ay “Fulhem” və “Luton”a 1:0, “Everton”a isə 3:0 hesabı ilə qalib gəlib.