İngiltərə premyer-liqasında fevralın ən yaxşı oyunçusu ilə məşqçisi müəyyənləşib.

“Ən yaxşı oyunçu” nominasiyasının qalibi “Liverpul”un müdafiəçisi Joel Matip olub. Kamerunlu futbolçu azarkeşlər arasında keçirilən səsvermədə hamını qabaqlayıb. Xatırladaq ki, Joel fevralda premyer-liqada meydana çıxdığı 4 matçda 1 qol və 1 məhsuldar ötürmə ilə yadda qalmışdı. O, 2018-ci ilin dekabrından sonra ayın ən yaxşısı seçilən ilk mərkəz müdafiəçisidi.

Premyer-liqada ötən ayın ən yaxşı məşqçisi üçün nəzərdə tutulan mükafata isə Eddi Hau sahib çıxıb. O, turnirin saytında azarkeşlər arasında keçirilən səsvermə və ekspertlərin rəyinə əsasən 1-ci yeri tutub. “Nyukasl”ın baş məşqçisi Yürgen Klopp (Liverpul), Mikel Arteta (Arsenal) və Ralf Hazenhüttlü (Sauthempton) qabaqlayıb. Haunun komandası ötən ay premyer-liqada keçirdiyi 4 matçda 3 qələbə qazanmış, 1 oyunu isə heç-heçə başa vurmuşdu.