Misli premyer-liqasında 16-cı tura start verilib.

"Football-plus.az" xəbər verir ki, "Sumqayıt" "Qarabağ"ı qəbul edib - 1:6. Matçdan sonra meydan sahiblərinin məşqçisi Mübariz Orucovun mətbuat konfransı keçirilib. Sizi onun fikirləri ilə tanış edirik:

- Qurban Qurbanov bildirdi ki, "Sumqayıt" öz oyun stilinə sadiq qaldı, 3:0 olanda da irəli getməkdən əl çəkmədi. Bu cür rəqibə qarşı bir az qapalı oynamaq olmazdı?
- Bizim öz futbolumuz var. İstəyirik ki, göz oxşayan futbol oynayaq, azarkeşlərimiz üçün gözəl futbol olsun. Qapanmaq məğlubiyyətdən qaçmaq deyil. Doğru futbol oynamaq istəyirik. Düzdü, hesab böyük oldu. Amma bu o demək deyil ki, qapansaydıq hesab kiçik olacaqdı.

- Mossi orta sahədə çempionatın ən yaxşılarındandı. Amma bu gün müdafiənin mərkəzində oynadı. Bu, böyükhesablı məğlubiyyətə nə dərəcədə təsir etdi?
- Yad mövqedə oynayırdı. Amma tək onun üzərinə də atmaq olmaz. Müdafiədə çaşqınlığın yaranmasına səbəb ola bilərdi. Bəlkə də, o mövqedə ilk dəfədir oynayırdı. Bəzi qollarda onun səhvləri var idi. Amma onu qınayası da deyilik. Məcburiyyətdən onu orada oynatdıq. Start heyətini düzəltməyə futbolçumuz yoxdu. Çətin dönəmdəyik. Zədəlilərimiz çoxdu.

- Əvəzedici heyətdən və yaxud da U-19 heyətindən əsas komandaya cəlb edəcəyiniz oyunçu yoxdu?
- Futbolçular var. Bu gün də ikinci hissədə gənclərə şans verdik. Amma elə mövqe var ki, oranı əvəz edəcək oyunçu əvəzedici heyətdə də yoxdu. Həssas mövqelər var ki, ora üçün akademiyada da oyunçu yoxdu.

- Komanda psixoloji cəhətdən özünə gələ biləcək?
- Allah qoysa, bu durumdan komandanı çıxaracağıq. Fasiləyə qədər son iki oyun vacibdi. Komanda toparlanıb, lazım olan nəticəni əldə edəcək.