Türkiyə Futbol Federasiyasının (TFF) nəzdində fəaliyyət göstərən Lisenziya Komitəsi Türkiyənin ən güclü 3 liqasında mübarizə aparan klubları “altyapı”, eləcə də hüquqi və maliyyə meyarlarına görə yoxlayıb.

“Football-plus.az” xəbər verir ki, bu yoxlama klublara beynəlxalq lisenziyaların verilməsi üçün keçirilir. İncələmələr nəticəsində 6 kluba xalsilmə cəzası verilib. Söhbət superliqa təmsilçisi “Kayserispor”, 1-ci liqa təmsilçiləri “Altay”, “Girəsunspor”, “Ərzurumspor” və 2-ci liqa təmsilçiləri “Bursaspor” ilə “Nazilli Bələdiyəspor”dan gedir. Bu klublara daha öncədən xəbərdarlıq edilsə də, onlar problemi aradan qaldırmayıblar. Ona görə də sözügedən 6 kollektivin hər birinin hesabından 3 xal silinib. “Kayserispor”un mətbuat katibi Samet Koç Apellyasiya Komitəsinə baş vuracaqlarını bildirib və problemin hardan qaynaqlandığına aydınlıq gətirib: “Beynəlxalq lisenziya almaq üçün çatışmazlıqları tamamlaya bilməməyimiz sırf əvvəlki problemli transferlərin yoluna qoyulmaması ilə bağlıdı. Amma yayda, bilindiyi kimi, transfer qadağasını aradan qaldırdıq. Bizim camiədə futbolçuların məvacibi də vaxtında ödənilir. Bu problemin də öhdəsindən gələcəyik. Əhval-ruhiyyəmizi korlamadan, tam ciddi şəkildə növbəti oyuna hazırlaşırıq. Problemli transferlərlə bağlı dosyelərdə razılaşmadığımız bəzi məqamlar var. Bu üzdən də bizə verilən cəza ilə bağlı Apellyasiya Komitəsinə müraciət edəcəyik”.

Heç də pis mövsüm keçirmyən “Kayserispor” 13 tura topladığı 23 xalla 6-cı pillədə qərarlaşıb və ən yaxın rəqibindən 4 xal öndədi.

Onu da vurğulayaq ki, TFF gələn mövsümdən etibarən superliqada pley-off sisteminin tətbiq edilməsi ilə bağlı layihənin üzərində ciddi şəkildə çalışır. Bu məsələ noyabrın 30-da TFF ilə Klublar Birliyi arasında keçirilən toplantıda da müzakirə olunub. Federasiya klublara mövsümün tam fərqli bir formatda keçirilməsini təklif edib. Superliqa klubları arasında pley-off sistemi ilə bağlı səsvermə keçiriləcək və bunun yekunu TFF-yə bildiriləcək.